У Літоўскім Сейме прайшла прэс-канферэнцыя з дэпутаткамі Рутай Мілюце і Лаймай Андрыкіене
У Літоўскім Сейме (Вільня) прайшла прэс-канферэнцыя з дэпутаткамі Рутай Мілюце і Лаймай Андрыкіене. Яны з’яўляюцца “хроснымі” зняволеных праваабаронцаў “Вясны” Марфы Рабковай і Леаніда Судаленкі (у межах кампаніі салідарнасці з беларускімі палітвязнямі #WeStandBYyou).
Кажа дэпутатка Лайма Андрыкіене:
– Леанід Судаленка – вядомы праваабаронца, і ён павінен быць на волі, таму што тыя абвінавачванні, якія былі высунутыя супраць яго, – гэта фэйк. Я казала на прэс-канферэнцыі пра тое, што ўсе палітзняволеныя, якія прызнаныя ў Беларусі палітзняволенымі, павінны быць на свабодзе.
На фота злева направа: Павел Сапелка, Віціс Юрконіс, Лайма Андрыкіене, Рута Мілюце, Наталля Сацункевіч
Пра дзейсную сітуацыю з правамі чалавека ў Беларусі нагадалі ў межах прэс-канферэнцыі прадстаўнікі праваабарончага цэнтра “Вясна”. Юрыст арганізацыі Павел Сапелка адзначыў, што Беларусь паступова становіцца сусветным ізгоем:
– Мы адчуваем сябе зараз, напэўна, як адчувалі сябе нашы дзяды, калі да хат беларусаў прыязджалі “варанкі”, аўтазакі і забіралі з дамоў людзей. Зараз розніца толькі ў тым, што гэта больш сучасныя мадэлі аўтамабіляў, і што людзей, якія трапляюць у турмы, не расстрэльваюць, іх проста ўтрымліваюць у нечалавечых умовах. Пад забаронай аказаліся гістарычныя нацыянальныя сімвалы – сцяг, герб.
Віціс Юрконіс, прадстаўнік праваабарончай арганізацыі Freedom House, у сваім выступе адзначыў, што Літва зрабіла многае для дапамогі Беларусі, але можна б было зрабіць яшчэ больш. Трэба радавацца кожнаму вызваленаму палітвязню, але не варта пападацца “на кручок”, як у 2015 годзе, “калі мы былі паблажлівыя да рэжыму”, адзначыў праваабаронца.
На фота: У прэс-канферэнцыі анлайн паўдзельнічала Аліна Стэфановіч, жонка Валянціна Стэфановіча
Ева Бардзілоўская, Беларускае Радыё Рацыя
Глядзіце таксама
