У Менску праходзіць пасяджэнне кантактнай групы па Украіне
У Менску праходзіць чарговае пасяджэнне трохбаковай кантактнай групы (Украіна — АБСЕ — Расея) па ўрэгуляванні сітуацыі на паўднёвым усходзе Украіны, паведамляе ў „Фэйсбуку” Дар’я Оліфер — прэс-сакратар украінскага прадстаўніка на перамовах Леаніда Кучмы.
Сустрэчы папярэднічалі перамовы ў рамках падгруп кантактнай групы. Сёння пасяджэнні праходзяць у комплексе „Дыпсэрвіс-хол”, яны традыцыйна закрытыя для прэсы.
Папярэдняе пасяджэнне кантактнай групы ў беларускай сталіцы адбылося 4 кастрычніка. Па яго выніках спецпрадстаўнік дзейнага старшыні АБСЕ Марцін Сайдзік заявіў журналістам, што ў верасні на ўсходзе Украіны было зафіксавана менш за ўсё пацярпелых за час канфлікту на Данбасе. Дыпламат падкрэсліў, што „колькасць парушэнняў рэжыму спынення агню застаецца прыкметна ніжэйшай, чым было да ўвядзення перамір’я перад пачаткам навучальнага года”. Ён адзначыў, што дзякуючы „школьнаму” перамір’ю і заключанаму раней „хлебнаму” перамір’ю атрымалася прыкметна скараціць колькасць ахвяр сярод мірнага насельніцтва. У той жа час Сайдзік заявіў, што сітуацыю ў зоне канфлікту пакуль нельга назваць стабільнай.
