У Варшаве ўшанавалі памяць Нямцова і падтрымалі Саўчанку
Словы “Забілі Нямцова, забіваюць Саўчанку” былі адным з галоўных лозунгаў акцыі пратэсту. Расейцы, украінцы, палякі і беларусы, якія знаходзяцца ў Варшаве, выйшлі на Замкавую плошчу, каб ушанаваць памяць забітага лідара расейскай апазіцыі Барыса Нямцова, а таксама падтрымаць Надзею Саўчанку, якая незаконна ўтрымліваецца ў маскоўскай турме.
Беларускі палітык Андрэй Саннікаў заклікаў Надзею Саўчанку спыніць галадоўку.
– Непатрэбная гэта смерць нам. Бо яна шмат робіць не толькі для народа Украіны, але для ўсіх нас. Яна патрэбная і ворагам. І так супала, што самы выбітны расейскі палітык быў забіты. Ён быў адным з тых, хто ніколі не сумняваўся, што Беларусь – гэта незалежная краіна, якая павінна быць свабоднай. І яго смерць – вялікая страта для нас.
Марыя Макарава, прадстаўнік камітэта “За свабодную Расею” выказала меркаванне, што сённяшнія дзеянні Крамля накіраваны ў першую чаргу на тое, каб пазбавіць расейскае грамадства сілаў і жадання змагацца.
– Мы хочам дэмакратычнай і свабоднай Расеі, стараемся змагацца з рэжымам Пуціна, наколькі дазваляюць нам нашыя магчымасці. Расея – гэта ж не толькі Пуцін, гэта і мы – маладое пакаленне расейцаў, якія жадаюць іншай Расеі. Нават 16% расейцаў, якія не падтрымліваюць Уладзіміра Пуціна, – гэта некалькі мільёнаў людзей. Расея – вялізная краіна з цэлым пакаленнем вольных людзей.
На акцыі выступілі вядомныя палітыкі і грамадскія дзеячы Польшчы, Расеі, Украіны, Татарстана і Беларусі.
[Not a valid template]
Кася Бергель, Беларускае Радыё Рацыя, Варшава
Фота аўтаркі
* * *
Вызваліць украінскую лётчыцу Надзею Саўчанку і спыніць расейскую агрэсію ва Украіне – пад такімі заклікамі прайшоў мітынг у Варшаве. Таксама ўдзельнікі ўзгадвалі забітага расейскага палітыка Барыса Нямцова. Сярод прысутных на мітынгу былі такія вядомыя палякі як галоўны рэдактар “Газеты выборчай” Адам Міхнік:
– Я тут таму, што салідарны з тымі людзьмі, якія прыйшлі сюды бараніць Надзею Саўчанку, якая знаходзіцца ў расейскай турме на мяжы са смерцю, а таксама ў знак салідарнасці з забітым Барысам Нямцовым. Мы – палякі – памятаем той час Салідарнасці, калі нам таксама была патрэбна дапамога і падтрымка.
Удзельнікі мітынгу ў Варшаве скандавалі «Мы хочам свабоднай Расеі!», «Слава Украіне!», трымалі транспаранты з надпісамі «Барыс забіты, Надзею забіваюць», «Захопнікі — прэч з Крыма». З прамовай выступіў і прадстаўнік крымска-татарскага народу.
Адам Завальня, Беларускае Радыё Рацыя, Варшава
Глядзіце таксама
