У Віцебску амаль няма інфармацыі пра выбары па-беларуску
Старшыня Віцебскай абласной Рады партыі БНФ Канстанцін Смолікаў падаў скаргу ў абласную выбарчую камісію пра адсутнасць беларускамоўнай інфармацыі пра выбары на афіцыйных сайтах.
Навінаў пра выбарчую кампанію па-беларуску няма ні на сайце аблвыканкаму, ні на сайце гарвыканкаму, ні на сайтах раённых адміністрацый, кажа Канстанцін Смолікаў:
– Гэтая старонка адразу пераскоквае ці на старыя навіны, якія зусім не тычацца выбараў, ці ўвогуле выдае памылку, што такіх старонак не існуе на беларускай мове. Такім чынам, ніякай інфармацыі па-беларуску датычна выбараў няма.
Odtwarzacz plików dźwiękowych
Падчас маніторынгу афіцыйных сайтаў Віцебшчыны, Канстанцін Смолікаў засведчыў яшчэ адно парушэнне: з 23-х сайтаў раённых адміністрацый вобласці бальшыня ўвогуле не мае беларускамоўнай версіі. Не мае яе і сайт Наваполацкага гарвыканкаму, гаворыць актывіст:
– Гэта парушэнне беларускага заканадаўства. Выканкамы парушаюць не толькі Закон аб мовах у Рэспубліцы Беларусь, але і пастанову Савета Міністраў ад 23 кастрычніка 2017 году, якая патрабуе ад усіх дзяржаўных органаў, каб сайты ўтрымлівалі інфармацыю на беларускай мове.
Odtwarzacz plików dźwiękowych
Што да візуальнай інфармацыі пра сёлетнюю выбарчую кампанію, то ў Віцебску практычна ўсе ўстановы і прадпрыемствы размясцілі абвесткі пра дзень выбараў. Пераважная колькасць з іх – таксама расейскамоўныя.
Ганна Ліпка, Беларускае Радыё Рацыя
