У Вярхоўным судзе прайшло папярэдняе паседжанне па скарзе БХД
Папярэдняе паседжанне па скарзе аргкамітэта па стварэнні Партыі „Беларуская хрысціянская дэмакратыя” да Міністэрства юстыцыі адбылося ў Вярхоўным судзе Беларусі. Мінюст раней адмовіў у рэгістрацыі партыі. Падставай для гэтага, у прыватнасці, стала тое, што некалькі чалавек пад ціскам вымушаны былі заявіць, што быццам не прымалі ўдзелу ў яе ўстаноўчым з’ездзе.
Па словах прадстаўніка аргкамітэта БХД на судзе Вольгі Кавальковай, разгляд справы па сутнасці, прызначаны на 13 кастрычніка:
– Асноўны момант – гэта ціск на людзей у некаторых рэгіёнах. З гэтай нагоды намі ў пачатку верасня ў Следчы каміэт пабыла пададзеная заява аб пачатку крымінальнай справы за прымус людзей у адмове ад подпісаў. Бо ёсць такія выпадкі.
Гэтыя адмовы ад удзелу ва ўстаноўчым з’ездзе Партыі БХД напісаны адной рукой, але подпісы пастаўлены ўжо іншай рукой. Тыксты аднолькавыя, напісаныя слова ў слова. Зразумела, што пісаліся яны пад дыктоўку, – лічыць Вольга Кавалькова. Але Мінюст гэтыя акалічнасці не зацікавілі.
Таму адмова ў рэгістрацыі Партыі БХД носіць несправядлівы і палітычны характар, – падкрэсліла Вольга Кавалькова.
Генадзь Барбарыч, Беларускае Радыё Рацыя
