Удзельнікі пікета ў падтрымку Лукашэнкі падпісваліся і за Бабарыку і Цапкалу
Першы публічны пікет у падтрымку Аляксандра Лукашэнкі прайшоў у Менску, каля гандлёва-забаўляльнага цэнтру „Дана Мол” на праспекце Незалежнасці. Яго ўдзельнікаў прывезлі на аўтобусах. Хутка былі разгорнуты некалькі палатак і сталоў для збору подпісаў і сцягі праўладных арганізацыяў БРСМ і „Белая Русь”.
Побач збіралі подпісы за альтэрнатыўных кандыдатаў Віктара Бабарыку і Валеру Цапкалу. Іх пікеты таксама працягнулі сваю працу. І некаторыя з прывезеных галасаваць за Лукашэнку не хавалі, што будуць падпісвацца і за альтэрнатыўных, а не толькі за цяперашняга кіраўніка дзяржавы.
– Дадзім шанец, няхай паспрабуе свае магчымасці.
РР: Але гэта ўжо шосты шанец.
– Ну калі ласка, чаму не. Усім дадзім магчымасць.
РР: То-бок, вы падпішыцеся не толькі за Аляксандра Лукашэнку?
– Не толькі, канешне. Мне яшчэ некалькі кандыдатаў падабаюцца.
РР: Як вам перадвыбарчая атмафера ў Беларусі?
– Напружаная.
Але мы чакаем, каб выбары прайшлі больш менш спакойна, — сказаў жыхар Менску Фёдар Падгайскі.
Іншы суразмоўца не пажадаў назваць свайго прозвішца, але таксама заявіў, што падпішацца і за іншых кандыдатаў, а не толькі за Аляксандра Лукашэнку.
– За ўсіх кандыдатаў.
РР: Як вы ацэньваеце сітуацыю ў краіне?
– Нармальная сітуацыя. Стабільная. Работа ёсць, жыллё ёсць, усё ёсць.
Чым гэта дрэнна, усё добра, — кажа адзін з ўдзельнікаў пікету па зборы подпісаў за Аляксандра Лукашэнку.
Беларускае Радыё Рацыя
