Украіна адгароджваецца ад Расеі
Паўстане сцяна паміж Украінай і Расеяй. На думку стваральнікаў гэтай абарончай сістэмы, яна павінна стрымліваць не толькі дыверсантаў, але і бронетэхніку.
Больш падрабязна – наш украінскі карэспандэнт Марцін Война.
– Сцяна на мяжы Украіны і Расеі вельмі нагадвае памежнае ўмацаванне паміж Ізраілем і Заходнім берагам ракі Ярдан. Тут і металічны плот вышынёй два метры, і калючыя дроты, і відэакамеры, і прылады начнога бачання, і цеплавізары. Прадугледжаны нават супрацьтанкавы роў глыбінёю два-тры метры і шырынёю ад чатырох да шасці метраў.
Мяркуецца, што ў разе масіраванага наступу расейскіх войскаў гэтае памежнае ўмацаванне на некаторы час спыніць агрэсію, пакуль да мяжы не падыдуць асноўныя сілы.
Пакуль сцяна ўзведзеная толькі ў Чарнігаўскай і Харкаўскай абласцях. Мяркуецца, што такія ўмацаванні з’явяцца не толькі па ўсёй працягласці ўкраінска-расейскай мяжы, але і на мяжы з анэксаваным Крымам, а таксама з Прыдняпроўскай рэспублікай.
Пра будаўніцтва сцяны паміж Украінай і Беларуссю гаворкі пакуль няма.
Марцін Война, Беларускае Радыё Рацыя
Глядзіце таксама
