Уступленне ў сілу Мытнага кодэкса ЕАЭС перанеслі на паўгода
Еўразійская эканамічная камісія (ЕЭК) паведаміла пра перанос на 1 студзеня 2018 года ўступлення ў сілу новага Мытнага кодэкса Еўразійскага эканамічнага саюза (ЕАЭС). Такое рашэнне было прынята 29 красавіка на Савеце ЕЭК.
Раней меркавалася, што Мытны кодэкс ЕАЭС уступіць у сілу з 1 ліпеня 2017 года. «Адначасова з кодэксам пачнуць дзейнічаць першачарговыя рашэнні камісіі па 25 пытаннях, аднесеных на наднацыянальны ўзровень. Яны тычацца рэгулявання дзейнасці ўпаўнаважаных эканамічных аператараў, правілаў перамяшчэння тавараў фізічнымі асобамі», — паведамляе ЕЭК.
Нагадаем, у канцы мінулага года Аляксандр Лукашэнка адмовіўся падпісваць Мытны кодэкс ЕАЭС, і гэта стала адной з асноўных праблемных кропак ва ўзаемаадносінах з Расеяй.
Больш за тое, ён рэзка выказаўся пра тое, што «шмат чаго, што павінна было быць, не працуе». «Больш за тое, я даручыў адклікаць асноўных нашых спецыялістаў з мытных органаў. Без вырашэння праблем я нават не дакрануся да гэтага кодэкса і іншых пытанняў», — падкрэсліў тады Лукашэнка.
У красавіку кіраўнік Беларусі ўсё ж падпісаў новы Мытны кодэкс ЕАЭС. Гэтаму спрыяла дасягненне дамоўленасцей паміж Менскам і Масквой па пастаўках газу і нафты.
Мытны кодэкс Еўразійскага эканамічнага саюза прыходзіць на змену Мытнаму кодэксу Мытнага саюза, прынятаму ў 2009 годзе. Дакумент, праца над якім вялася цягам 3 гадоў, прадугледжвае перанос шэрагу паўнамоцтваў на ўзровень ЕЭК, а таксама спрашчэнне мытных працэдур для бізнесу.
Паводле Tut.by
Фота president.gov.by
