Вадзім Саранчукоў: Мы праходзілі “дэмакратызацыю” і ў 2006 годзе, і ў 2010 годзе
Гарадзенскія ўлады да 17 ліпеня бягучага года павінны агучыць пералік грамадскіх месцаў, дзе будзе забаронена пікетаванне і збор подпісаў у падтрымку таго ці іншага кандыдата ў прэзідэнты падчас выбарчай кампаніі.
Актывісты апазіцыйных партый Прынёмання выказваюць меркаванні, што найбольш даступныя і людныя месцы горада трапяць у пералік забароненых, што на думку старшыні гарадской арганізацыі партыі БНФ Вадзіма Саранчукова ў сённяшняй сітуацыі цалкам верагодна:
– З усіх бакоў фіксуюцца пасылы, што будзе “чарговая дэмакратызацыя”. Мы ўжо праходзілі такую “дэмакратызацыю” – і ў 2006 годзе, і ў 2010 годзе. Ніякіх глабальных зменаў у параўнанні з папярэднімі кампаніямі я не прагназую. Не будзе падліку галасоў, не будзе роўнасці ўсіх кандыдатаў. Не будзе нармальных умоваў для агітацыі і збору подпісаў.
Падчас апошніх прэзідэнцкіх выбараў ўлады Гародні дазволілі правядзенне пікетаў для збору подпісаў за вылучэнне апазіцыйных кандыдатаў у самых людных месцах горада, у тым ліку каля рынкаў і вакзалаў.
Бягучым часам у горадзе над Нёманам актыўна фармуюцца ініцыятыўныя групы двух магчымых кандыдатаў – Анатоля Лябедзькі і Таццяны Караткевіч.
Беларускае Радыё Рацыя, Гародня
Глядзіце таксама
