Валер Цапкала выступіў на пікеце па зборы подпісаў у Віцебску
На сустрэчу з ім прыйшлі каля 300 чалавек, некаторыя загадзя падрыхтавалі пытанні да патэнцыйнага кандыдата на прэзідэнцкую пасаду. Пытанні датычыліся эканомікі, экалогіі, медыцыны і нават таго, якую прафесію варта абраць сённяшняй моладзі. Валер Цапкала паведаміў, што ў выпадку абрання яго прэзідэнтам, Расея стане адной з першых краінаў, куды ён накіруецца з афіцыйнным візітам. “Бо з Расеяй у нас асаблівыя адносіны”, – патлумачыў патэнцыйны кандыдат.
Што да бліжэйшых планаў – дзейнасці пасля сканчэння збору подпісаў, – то спадар Цапкала паведаміў наступнае:
– Далей – чакаем: сустракаемся, чытаем лекцыі, чакаем рэгістрацыі.
РР: Калі Вас зарэгістравалі, і зарэгістравалі яшчэ некалькі вашых калегаў, то ці плануеце аб’ядноўвацца, абіраць “адзінага”?
Валер Цапкала: Не, я лічу, што чым больш кропак гледжання, чым больш варыянтаў развіцця Беларусі, якія прапануюць кандыдаты, тым будзе лепей для беларускага грамадства.
РР: А калі Вас не зарэгіструюць, якія вашыя планы?
Валер Цапкала: Ну, давайце мы пагаворым потым пра гэта.
РР: А калі зарэгіструюць, Вы будзеце адстойваць вашыя галасы, калі на выбарах ЦВК напіша вам 3%?
Валер Цапкала: Давайце потым.
Падчас сустрэчы ў Віцебску Валер Цапкала паведаміў, што на ягоную падтрымку сабрана ўжо 120 тысяч подпісаў. Сустрэча працягвалася прыблізна дзве гадзіны, патэнцыйнага кандыдата суправаджала група падтрымкі ў адмысловых майках з імем і прозвішчам прэтэндэнта. Разам з Валерам Цапкалам у Віцебск прыехала і ягоная жонка Вераніка.
Беларускае Радыё Рацыя, Віцебск
Глядзіце таксама
