Валеры Кавалеўскі: Імкнемся вывесці беларускае пытанне на міжнародны парадак дня
У эфіры Беларускага Радыё Рацыя пабываў прадстаўнік офісу Святланы Ціханоўскай Валеры Кавалеўскі. З ім паразмаўляў Улад Грынеўскі.
Спадар Валер! Ведаю, што вы зараз знаходзіцеся ў Вашынгтоне. Доўга рыхтаваўся гэты візіт і ці можам гаварыць зараз, што беларуская павестка дня выходзіць зусім на новы міжнародны ровень у сувязі з візітам Святланы Ціханоўскай у ЗША?
– Дзякуй за запрашэнне на размову. Візіт сапраўды доўга рыхтаваўся, Чаканні сфармаваліся досыць даўно. Урэшце рэшт да гэтага мы прыйшлі. Замінаў ковід, абмежаванні па падарожжах. Але зараз на гэта самы час – і гэта робіцца своечасова. Выезд у ЗША выводзіць беларускую праблематыку з рэгіянальнай, еўрапейскай, на глабальны ровень. Не толькі таму, што беларускае пытанне вымагае такой глабальнай увагі, але і таму, што ўсё, што робіцца ў Вашынгтоне, яно чуецца ва ўсіх кутках нашай планеты, кожная заява адтуль. Таму можна казаць пра тое, што будзе звяртацца больш увагі на беларускую праблематыку. Мы пакрэсліваем на такіх сустрэчах, што беларуская праблема, крызіс у Беларусі – яны закранаюць многія іншыя краіны. Ніхто не хоча, каб дыктатар перамог і рэвалюцыя загінула.
– Якая асноўная канцэпцыя гэтага візіту – расказаць амерыканскім палітыкам якія бедныя беларусы, знайсці нейкую падтрымку?
– Перш за ўсё вывесці беларускае пытанне на першыя радкі ў міжнародным парадку дня. Само знаходжанне ў Вашынгтоне, сустрэчы на сама высокім роўні дапамагаюць гэта зрабіць. І паказаць усім тое, што адбываецца ў Беларусі. Другое, гэта ціск на рэжым на Лукашэнкі з тым, каб спыніліся рэпрэсіі, каб пачаўся дыялог, які прывядзе ўсіх нас да выбараў. І гэты ціск можа быць розным – ён можа быць палітычным, ён можа быць дыпламатычным, ён можа быць і санкцыйным. І пра гэта мы таксама будзем гаварыць. Што тыя санкцыі, якія прымаліся ЗША, яны могуць узмацняцца і далей. Мы гаворым таксама і пра салідарнасць, пра дапамогу грамадзянскай супольнасці, пра дапамогу незалежным СМІ, і пра дапамогу тым людзям, якія пацярпелі ад рэпрэсій, іх сем’ям…Урэшце, я б сказаў, што ў нас два такія важныя блокі – мы гаворым тут пра сённяшні дзень, пра тое, што адбываецца сёння і як рэагаваць на сённяшнюю сітуацыю, але вельмі важна, што мы будзем гаварыць і пра будучае. Мы хочам размаўляць пра тое, якой будзе Беларусь, калі прыйдуць дэмакратычныя перамены і чым нам могуць дапамнчы ЗША. Шэраг сустрэч будзе прысвечана менавіта таму, каб абмеркаваць нашу візію для будучай Бедарусі.
Цалкам гутарку слухайце ў далучаным файле:
Беларускае Радыё Рацыя
