Валерый Карбалевіч: “Беларускае пытанне” ў ЕЗ не на першым плане
Міністр замежных спраў Уладзімір Макей не верыць, што Еўрасаюз адрэагуе на вызваленне Алеся Бяляцкага.
Палітолаг Валерый Карбалевіч кажа, што пасля вызвалення праваабаронцы афіцыйны Менск вельмі хацеў бы пабачыць нейкія “знакі ўвагі” з боку Захаду.
Міністр замежных спраў Беларусі Уладзімір Макей ў інтэрв’ю праграме «Галоўны эфір» заявіў: “Нават калі б мы вызвалілі тых, каго яны называюць палітвязнямі, то нам заўтра будуць выстаўленыя новыя прэтэнзіі. Напрыклад, чаму ў Беларусі не рэгіструюцца аднаполыя шлюбы. Да нас бы выказалі прэтэнзіі, што дзеці называюць бацькоў «мама» і «тата», а не так, як патрабуецца там – «бацькі №1 і №2»… І гэдак далей”.
РР: Відавочна, што Алеся Бяляцкага ўлады вызвалілі не проста так, а таму выклікаюць некаторае здзіўленне прэтэнзіі Макея да Еўразвяза. Каму яны адрасаваны ў першую чаргу?
Валерый Карбалевіч: Міністр замежных спраў Беларусі павінен добра ведаць умовы нармалізацыі дачыненняў з Еўропай. Адна з галоўных – вызваленне палітвязняў, пасля чаго і можа распачацца размова. Таму заяву Макея, на мой погляд, трэба разглядаць з двух бакоў. Першы – гэта такі прапагандысцкі прыём, якія неаднаразова выкарыстоўваецца беларускай прапагандай, калі заходнія каштоўнасці і мадэль жыцця праецыру.цца толькі на існаванне ў Еўропе сэксуальных меншасцяў. Другі момант – Менск падае сігнал Захаду, што Беларусь чакае нейкіх канкрэтных крокаў ад Еўропы ў адказ на вызваленне Бяляцкага. Маўляў, мы пайшлі вам насустрач – пакажыце і свае дзеянні.
РР: А якія крокі з боку Еўразвяза хацелі б бачыць беларускія ўлады?
Валерый Карбалевіч: Можа быць, ліквідацыю нейкіх візавых ці эканамічных санкцый адносна некаторых беларускіх алігархаў. ЗША таксама не адмянялі свае санкцыі датычна прадпрыемстваў “Белнафтахіма”. А можа і проста афіцыйны Менск быў бы задаволены запрашэннем Лукашэнкі на нейкую еўрапейскую тусоўку, як у свой час афіцыйнага беларускага лідара запрасілі ў Літву. Думаю, для беларускай улада гэта быў бы таксама знакавы сігнал, і, магчыма, пасля гэтага на волю б выйшлі і астатнія палітвязні.
РР: Як мяркуеце: ці пойдзе Еўропа на такія крокі?
Валерый Карбалевіч: Цяжка сказаць, таму што зараз у Еўразвязе “беларускае пытанне” знаходзіцца не на першым плане. У прыярытэце – українскі крызіс, а таму на розныя сігналы з боку Беларусі там могуць проста не звернуць увагі. Думаю, ужо ў бліжэйшы час даведаемся, як будуць развівацца падзеі.
Кастусь Заблоцкі, Беларускае Радыё Рацыя
Фота dw.de
