Віталь Рымашэўскі: Будзем змагацца, каб перамагчы
Штаб дэмакратычнай кааліцыі па вылучэнні адзінага кандыдата на прэзідэнцкія выбары прадставіў у Менску стратэгію сваіх дзеянняў. Па словах сустаршыні Беларускай хрысціянскай дэмакратыі Віталя Рымашэўскага, у падмурку гэтай стратэгіі – кампанія за перамены ў краіне. „Мы будзем змагацца, каб перамагчы, змяніць дзейсную ўладу і правесці палітычныя, эканамічныя і сацыяльныя рэформы дзеля дабрабыту, дзеля бяспечнай будучыні кожнай беларускай сям’і,” – кажа Віталь Рымашэўскі.
– Мы прапануем не толькі персанальную альтэрнатыву Аляксандру Лукашэнку рыхтаваць, але рыхтаваць народную праграму для народнага кандыдата. Праз некалькі тыдняў праекты рэформаў па асноўных галінах – гэта і адукацыя, і пенсійная рэформа, і рэформа судовай сістэмы і іншыя важныя рэчы будуць выкладзеныя ў адкрыты доступ. Кожны грамадзянін Беларусі зможа далучыцца да гэтага абмеркавання.
Канчатковая прэзентацыя стратэгіі адбудзецца на Кангрэсе дэмакратычных сілаў, на якім будзе абраны адзіны кандыдат. Плануецца, што кангрэс адбудзецца 31 мая, – нагадаў Віталь Рымашэўскі.
Таксам палітык адзначыў, што ўдзельнікі дэмакратычнай кааліцыі вырашылі працягваць супрацу і пасля завяршэння прэзідэнцкай кампаніі.
– Гэта значыць, што ў выпадку фальсіфікацыі мы будзем праводзіць акцыі пратэсту, патрабаваць перавыбараў. У выпадку, калі ўлады адмовяцца ісці на перавыбары пры адбыўшыхся фальсіфікацыях, мы пакідаем за сабой права заклікаць да нацыянальнага страйку.
Таксама ў выпадку адмовы ў рэгістрацыі адзінага кандыдата мы звернемся да нашых прыхільнікаў не падтрымліваць іншых кандыдатаў і будзем разглядаць магчымасць байкоту. Таксама пакідаем за сабой гэта права і ў выпадку рэпрэсій супраць удзельнікаў выбарчай кампаніі, журналістаў, актывістаў, – падкрэсліў Віталь Рымашэўскі.
Беларускае Радыё Рацыя, Менск
Фота svaboda.org
