Віталь Рымашэўскі: Заўтра могуць выйсці на вуліцы сотні тысяч людзей
Палітык Віталь Рымашэўскі прапануе зрабіць 15 сакавіка днём агульнанацыянальнага пратэсту супраць дэкрэта „аб дармаедах”. Сёння, 22 лютага, у Менску лідары кампаніі „Мы не дармаеды!” правялі збор подпісаў за адмену дэкрэта № 3:
– Да 15 сакавіка мы плануем, што збярэм не менш за 100 тысячаў подпісаў. Мы заклікаем сёння і Аляксандра Лукашэнку, і прэм’ер-міністра, і ўсіх адказных за дзеянне гэтага дэкрэта выйсці да людзей 15 сакавіка. Мы чакаем іх на плошчы, таму што хопіць ужо ўдзельнічаць у сустрэчах нібыта з народам з падстаўнымі людзьмі. Калі ласка, мы запрашаем усіх міністраў паразмаўляць з людзьмі.
Па словах Рымашэўскага, людзі актыўна падпісваюцца за адмену дэкрэта. Гэта значыць, што заўтра на вуліцы выйдуць сотні тысяч, калі ўлады не пойдуць на саступкі грамадзянам.
Беларускае Радыё Рацыя
