Войцех Сегень: Расея стала ахвярай свайго ўласнага стэрэатыпу ўкраінцаў
Ужо 9-ты дзень Украіна бароніць сваю тэрыторыю. Учора закончыўся другі раўнд украінска-расейскіх перамоваў, падчас якіх бакі дамовіліся пра чарговую сустрэчу. Якія перспектывы ў расейскага ўварвання ва Украіну, і ці перамовы Масквы і Кіева могуць закончыць гэтую вайну?
Пра гэта гутарым з экспертам па пытаннях Усходняй Еўропы – кандыдатам навук Гданьскага ўніверсітэту Войцехам Сегенем:
-Я думаю, што ніхто ў перамовы не верыць. Яны вядуцца таму, што мусяць весціся. Украінцы ведаюць адну рэч на 100% – гэта вайна завершыцца ваенным шляхам. І тут няма ўжо ілюзій, што «рускія браты» не нападуць, што немагчыма, каб бамбавалі Харкаў і Кіеў – «маці гарадоў рускіх». Сітуацыя цягам тыдня паказвае, што ўкраінскія палітыкі ведаюць, што ёсць толькі адзін шлях завершыць гэты канфлікт. І гэты шлях – ваенны. Украінцы зараз зразумелі тое, чаго не зразумелі беларусы ў 2020 годзе – што не трэба збіраць смецце падчас рэвалюцыі, а трэба ісці на барыкады. Яны цяпер плацяць за гэта тым, што гвалтам уваходзяць ва Украіну. І будуць асацыявацца з гэтым гвалтам.
РР: Ці змогуць выстаяць украінцы? Бо мы ведаем маштабы расейскай арміі, падмацаванай арміяй Беларусі. Гэта адна з буйнейшых армій свету. Якія Вашыя прагнозы?
Войцех Сегень: Некаторыя аналітыкі перад вайной выказваліся, што вельмі верагодна тое, што гэтая вайна можа закончыць існаванне сённяшняй Расеі. Не адбыўся бліцкрыг. Тое, што ўкраінцы атрымліваюць падтрымку ўсяго свету, тое, што яны выстаялі тыдзень і выстаяць наступны тыдзень. І кожны дзень набліжае Расею да яе канца ў той форме, якую мы ведаем. Самі расейскія аналітыкаі казалі, што гэта будзе канец для Расеі. І гэта ёсць канец для Расеі.
РР: Да гэтай пары мы глядзелі на Пуціна, як, магчыма не прадказальнага, але рацыянальнага палітыка. Ён да гэтай вайны рыхтаваўся. І ён, як кажуць, «хітры кэгэбіст», перахітрыў сам сябе. Як гэта разумець?
Войцех Сегень: Гэта было б рацыянальна тады, калі б іх план быў рэалізаваны. А іх план быў такі: праз два – максімум тры дні яны ў Кіеве. Януковіч ў Менску сядае ў самалёт і ляціць у Кіеў. І ў Кіеве маем новы ўрад. Мэта гэтага – адбудова імперыі. І ў гэтым сэнсе эканамічная падрыхтоўка, якая пачалася ў 2014 годзе, была б рацыянальнай толькі тады, калі б гэты план быў рэалізаваны так, як яны хацелі. Але яны не ўзялі пад увагу розныя фактары і перш за ўсё – чалавечага фактару. І што людзі выйдуць, часам без зброі, і будуць рукамі выпіхваць бэтээры са сваіх гарадоў. А таму так выйшла, што рускія сталі ахвярамі свайго ўласнага стэрэатыпу ўкраінцаў. Пуцін шмат паставіў на тое, што ўсё пройдзе так, як ён планаваў. А як магло быць інакш? Найбольшая армія ў свеце. Украіна акружаная з трох бакоў. Тут яшчэ беларусы, як падпанкі, пад панам рускім дапамогуць. Не магло не атрымацца, з іхнага пункту гледжання. І ўсе прамовы пуцінскія: «недогосударство», «нет такого народа», «Ленин придумал». А зараз гісторыя імчыцца як Formula 1.
РР: Ці рэальным ёсць выкарыстанне Пуціным ядзернай зброі?
Войцех Сегень: Можа мець месца тактычная ядзерная атака, якой могуць карыстацца пад Кіевам, у Кіеве,у Харкаве і іншых гарадах. І тое, што адбывалося пазаўчора, – яны выкарысталі вакуумную бомбу. Крок за крокам набліжаемся да рэальнай магчымасці таго, што рускія выкарыстаюць такстычную ядзерную зброю.
ЗША абвінавачваюць Расею ў выкарыстанні касетных бомбаў супраць мірных жыхароў Украіны і бачаць намер Масквы выкарыстоўваць іншыя віды зброі, забароненыя міжнароднымі дамовамі.
Цалкам гутарка ў далучаным файле:
Беларускае Радыё Рацыя
