З Узбекістана ў Беларусь прыбыў самалёт з маскамі і сродкамі засцярогі
Гуманітарная дапамога з Узбекістана для барацьбы з распаўсюджваннем каранавіруса прыбыла ў Беларусь, паведаміла прэс-служба МНС.
Ваенны борт ІЛ-76 з вырабамі медыцынскага прызначэння прыбыў у нацыянальны аэрапорт Мінск у ноч на 12 красавіка.
У складзе грузу — аднаразовыя камбінезоны, рэспіратары, ахоўныя акуляры, латэксныя пальчаткі і маскі (усяго 513 тыс. вырабаў для засцярогі). Таксама дастаўленыя 500 тыс. пагонных метраў марлі, 50 тыс. упаковак антысептыкаў і 10 тыс. літраў медыцынскага спірту.
Разгрузку гуманітарнага грузу ажыццявілі курсанты Універсітэта грамадзянскай абароны МНС.
Прэс-служба нагадала, што Беларусь была першай краінай, якая накіравала паводле даручэння кіраўніка дзяржавы два самалёты ў Кітай з таварамі медыцынскага прызначэння вагой прыблізна 40 тон — 29 студзеня і 5 лютага.
belapan.by
