Затрымана старшыня „Прэс-клубу” Юлія Слуцкая
Беларускія праваахоўнікі затрымалі ў аэрапорце Менск-2 заснавальніцу „Прэс-клубу”, былую рэдактарку „Камсамольскай праўды ў Беларусі”, экс-кіраўніцу “Еўрарадыё” Юлію Слуцкую.
Вобшукі ідуць таксама ў яе кватэры і ў кватэры топ-менеджара Прэс-клубу Алы Шарко. Заблакаваны таксама і офіс арганізацыі ў Менску. Хутчэй за ўсё, там таксама ідзе вобшук.
Па словах адваката Сяргея Зікрацкага, ён спрабаваў патрапіць у кватэру Алы Шарко, але яго груба выпхнулі з кватэры:
– Я тут у пад’ездзе, дзе пражывае Ала Шарко. Чакаю, пакуль скончацца следчыя дзеянні.
РР: Можаце патлумачыць, на якіх падставах вас не пусцілі ў кватэру?
– Мне пакуль складана нешта тлумачыць. Так, я лічу, што гэта парушэнне.
РР: А наконт Юліі Слуцкай ёсць інфармацыя?
– У мяне ўвогуле няма ніякай інфармацыі. Уся інфармацыя, якая ў мяне ёсць, гэта тая інфармацыя, якая ідзе з тэлеграм-канала. Я поста прыехаў сюды і паспрабаваў патрапіць у кватэру. Мяне выкінулі.
Па словах Сяргея Зікрацкага, тыя людзі ў масках, якія ўварваліся ў кватэру Алы Шарко, не прадставіліся, да якога ведамства належаць, – міліцыі, КДБ, Следчага камітэту, і з чым звязаны гэты вобшук.
Беларускае Радыё Рацыя, Менск
