БАТЭ зрабіў падарунак 6-гадоваму фанату
Кранальная гісторыя адбылася пасля паразы БАТЭ ад жодзінскага “Тарпеда — БелАЗ” у фінале Кубка Беларусі. Матч праходзіў 21 траўня ў Берасці. Пасля серыі пенальці, дзе барысаўчане саступілі з лікам 2:3, у аб’ектыў камеры аднаго з аператараў трапіў хлопчык, заплаканы заўзятар БАТЭ.
Відэа пабачылі супрацоўнікі клуба, пасля чаго размясцілі ў сваіх афіцыйных акаунтах у сацыяльных сетках наступнае паведамленне:
“Сябры, шукаем гэтага хлапчука, які так цяжка перажываў паражэнне нашай каманды ў фінале Кубка. Калі хтосьці ведае як можна звязацца з ім/яго бацькамі — паведаміце”.
Хлопчыка знайшлі праз некалькі гадзін. Ім аказаўся жыхар Берасця, шасцігадовы Матвей. БАТЭ зняў для яго адмысловае відэа. У роліку футбаліст БАТЭ Аляксандр Валадзько гаворыць, што каманду вельмі ўразілі эмоцыі хлопчыка. Таму футбалісты вырашылі зрабіць для яго адмысловую майку з імем Матвей на спіне і нумарам 12. Акрамя гэтага, супрацоўнікі клуба запрасілі Матвея на хатні матч БАТЭ супраць “Граніта”, які пройдзе на “Барысаў — Арэне” 5 чэрвеня.
