Беларускія гандбалісты выйшлі ў паўфінал моладзевага чэмпіянату Еўропы
Беларускія гандбалісты за тур да заканчэння папярэдняга этапу маладзёжнага чэмпіянату Еўропы (U-20) у другім дывізіёне забяспечылі сабе месца ў паўфінале.
Сваю чацвёртую вікторыю запар у папярэдняй групе А беларусы здабылі над равеснікамі з Фінляндыі – 39:30. Раней каманда Алега Шарэйкі перамагла зборныя Грэцыі (34:24), Эстоніі (29:22) і Літвы (30:20).
У чацвер, 26 ліпеня, беларуская „маладзёжка” завершыць першы этап кантынентальнага першынства сустрэчай з гандбалістамі Фарэрскіх астравоў. Турнірнае становішча пасля чатырох гульнявых дзён: Беларусь – 8 ачкоў, Эстонія – 4, Фарэрскія астравы – 4, Літва – 3, Фінляндыя – 3, Грэцыя – 2. У папярэдняй групе В становішча каманд такое: Македонія – 5 (3 матчы), Швейцарыя – 4 (3), Украіна – 4 (3), Італія – 3 (3), Вялікабрытанія – 0 (4).
У паўфінал выйдуць па дзве лепшыя каманды з кожнай групы. Паўфінальныя гульні адбудуцца 28 ліпеня, іх пераможцы 29 ліпеня сустрэнуцца ў матчы за першае месца, а прайграўшыя правядуць паядынак за 3-е падагульняючае месца.-
