Беларускія валейбалісткі згуляюць на ЧЕ з прызёрамі Алімпіяды
Беларускія валейбалісткі згуляюць сёння, 28 верасня, на чэмпіянаце Еўропы ў Баку з сярэбранымі прызёрамі Алімпіяды камандай Сербіі.
Каманда з Балкан з’яўляецца адным з фаварытаў валейбольнага еўрафоруму. У 2015 годзе сербкі занялі трэцяе месца на чэмпіянаце, а ў 2016 годзе ў Рыа-дэ-Жанэйра на Алімпійскіх гульнях уступілі толькі ў фінале Кітаю. На бягучым турніры саперніцы беларусак атрымалі тры перамогі – над Нідэрландамі (3:0), Чэхіяй (3:0) і Бельгіяй (3:1).
Трэнерскаму штабу беларусак перад сустрэчай з такім апанентам неабходна вырашыць галоўную праблему – наладзіць гульню ў прыёме мяча і нападзенні. Якім будзе трыа форвардаў (два даігроўшчыкі і дыяганальны ігрок) у стартавым складзе – найбольш цікавае пытанне. Неабходна прымусіць грозную атаку сербак дзейнічаць на высокіх мячах, выключыць хуткія перадачы саперніц на краі сеткі. Бо адна з галоўных прычын няўдачы беларусак у першых двух сэтах у матчы з Чэхіяй – хуткая перадача апанентаў, за якой блакіруючыя не паспявалі перамяшчацца на краі сеткі.
Зборная Беларусі прабілася ў чвэрцьфінал чэмпіянату ўпершыню з 1995 года. На папярэднім кантынентальным форуме ў 2015 годзе наша зборная заняла дзявятае месца.
