Беларусы выйшлі ў паўфінал турніру ў турэцкім Эрзуруме
Хакеісты зборнай Беларусі (U-17) выйгралі ў равеснікаў са Славакіі з лікам 3:1 на XIII зімовым Еўрапейскім юнацкім фестывалі ў турэцкім Эрзуруме і выйшлі ў паўфінал турніру.
Дакладнымі кідкамі ў складзе каманды пад кіраўніцтвам Уладзіміра Магдзеева вызначыліся Кірыл Мяжэйнікаў, Іван Пусеў і Віктар Масілевіч. Беларускія хакеісты выйшлі ў паўфінал турніру, дзе сустрэнуцца з камандай, якая зойме другое месца на папярэдняй стадыі ў групе А (Расія, Францыя і Турцыя). Расіяне занялі ў гэтай групе першае месца. Яны нанеслі паражэнне гаспадарам фестывалю 42:0 і абыгралі французаў 9:0. Сапернік беларусаў у 1/2 будзе вызначаны на сустрэчы Францыя-Турцыя, якая адбудзецца ў Эрзуруме 15 лютага. Медалі ў хакейным турніры Еўрапейскага юнацкага фестывалю будуць разыграны 17 лютага.
Усяго ў складзе беларускай дэлегацыі на спаборніцтвах у Эрзуруме 43 атлеты, якія выступаюць у шасці відах спорту: хакеі з шайбай, біятлоне, лыжных гонках, шорт-трэку, горных лыжах і фігурным катанні.
