ФІДЭ дыскваліфікавала Сяргея Каракіна за падтрымку ваенных дзеянняў РФ ва Украіне
Камісія па этыцы Міжнароднай шахматнай федэрацыі (ФІДЭ) дыскваліфікавала расейскага гросмайстра Сяргея Каракіна на шэсць месяцаў. Раней шахматыст падтрымаў вайну Расеі ва Украіне.
Сяргей Каракін прызнаны вінаватым у парушэнні кодэкса этыкі ФІДЭ, яму на шэсць месяцаў забараняецца ўдзельнічаць у якасці гульца ў любых рэйтынгавых шахматных турнірах ФІДЭ. Дыскваліфікацыя Каракіна не дазволіць яму згуляць на турніры прэтэндэнтаў, які пройдзе з 16 чэрвеня па 7 ліпеня.
Беларуская тэнісістка Арына Сабаленка апусцілася на пятае месца ў рэйтынгу WTA
Беларуска Арына Сабаленка перамясцілася на пятае месца ў рэйтынгу Жаночай тэніснай асацыяцыі (WTA). Найлепшая беларуская тэнісістка няўдала выступіла на буйным турніры ў амерыканскім Індыян-Уэлсе і апусцілася з трэцяй на пятую пазіцыю. Цяпер у актыве Арыны Сабаленкі 4862 ачкі. Вікторыя Азаранка знаходзіцца на 16-й пазіцыі (2336 ачкоў). Аляксандра Сасновіч займае 60-е месца (1033). Лідыруе па-ранейшаму аўстралійка Эшлі Барці.
Сталі вядомыя паўфінальныя пары мужчынскага і жаночага Кубкаў Беларусі па гандболе
У офісе Беларускай федэрацыі гандбола адбылося лёсаванне фіналаў чатырох мужчынскага і жаночага Кубкаў краіны, паведамляе прэс-служба БФГ. Розыгрыш Кубка ў мужчын пройдзе 28-29 траўня ў Магілёве. У першым паўфінале гаспадар турніру „Машэка” сустрэнецца з дзейным уладальнікам трафея БГК „Мяшкоў Берасце”. Другую пару склалі сталічны СКА і „Гомель”. Фінал чатырох у жанчын адбудзецца ў Наваградку 21-22 траўня. У першым паўфінале „БНТУ-БелАЗ” згуляе з „Гараднічанкай”, следам на пляцоўку выйдуць „Вікторыя-Берасце” і „Гомель”, які стаў пераможцам жаночага Кубка летась.
Дзібала пакіне «Ювентус» бясплатна сёлета
Нападнік Паўла Дзібала блізкі да сыходу з «Ювентуса». Адбылася сустрэча агента 28-гадовага форварда і кіраўніцтва «б’янканеры». Бакі абмяркоўвалі ўмовы новага кантракта аргенцінца, але не змаглі дамовіцца. Такім чынам, усё ідзе да таго, што Дзібала, тэрмін дамовы якога заканчваецца сёлета, па завяршэнні сезона пакіне турынскую каманду вольным агентам. Галоўным прэтэндэнтам на футбаліста з’яўляецца «Інтэр». Таксама ён цікавы «Атлетыка».
Беларускае Радыё Рацыя
Фота: АГН Москва
