Французы абыгралі немцаў, а партугальцы – вугорцаў
Футбалісты зборнай Францыі адолелі каманду Нямеччыны з лікам 1:0 у апошнім матчы першага тура чэмпіянату Еўропы. Матч у Мюнхене пачаўся ў сярэднім тэмпе і ў першай палове дамінавалі французы. У іх шэрагах вылучаўся Поль Погба, які ўвесь час спрабаваў вывесці партнёраў на ўдарную пазіцыю. На 20-й хвіліне ён пачаў атаку, пасля якой абаронца немцаў Мац Хумельс зрэзаў мяч у сваю браму. Пасля перапынку нямецкія футбалісты працягвалі нагнятаць ціск, французы адказвалі хуткімі контрвыпадамі Мбапэ і Бензема, і нават двойчы забівалі галы, але іх адмянялі з-за афсайду. У выніку чэмпіёнам свету ўдалося ўтрымаць мінімальную перавагу. У першым паядынку папярэдняй групы F чэмпіёны кантынента партугальцы перамаглі ў Будапешце вугорцаў з лікам 3:0. Галявы дубль капітана зборнай Партугаліі Крышціяну Раналду дазволіў яму стаць лепшым бамбардзірам фінальных турніраў Чэмпіяната Еўропы – цяпер на яго рахунку 11 мячоў. Партугалец абышоў француза Мішэля Плаціні, які забіў 9 мячоў. Сёння стартуюць сустрэчы другога тура. У папярэдняй групе А зборная Італіі згуляе ў Рыме з камандай Уэльса. У Баку футбалісты Турцыі сустрэнуцца са швейцарцамі. У першым паядынку другога тура ў групе В расіяне прымуць у Санкт-Пецярбургу зборную Фінляндыі.
Футбалісткі юніёрскай зборнай Беларусі перамаглі армянак у таварыскіх матчах
Футбалісткі юніёрскай зборнай Беларусі (U-19) двойчы буйна абыгралі аднагодак з Арменіі ў таварыскіх матчах у Мінску. У другім спарынгу на полі ФК „Мінск” гаспадыні разграмілі гасцей з лікам 7:1. Хет-трык у свой актыў запісала Наталля Асмыковіч. У першым кантрольным матчы беларуская каманда выйграла ў армянак 3:0. Для беларусак гэтыя спарынгі сталі адным з этапаў падрыхтоўкі да старту ў адборавым турніры чэмпіянату Еўропы. Увосень у першым раўндзе кваліфікацыі суперніцамі беларускай дружыны будуць футбалісткі Кіпра, Фарэрскіх выспаў і Паўночнай Македоніі.
Антон Сарока пакінуў БАТЭ
Беларускі форвард БАТЭ Антон Сарока пакінуў БАТЭ. Пра гэта паведаміла прэс-служба барысаўскай каманды. У афіцыйных турнірах за асноўную каманду „жоўта-сініх” нападнік правёў 25 матчаў, забіў 5 галоў і аддаў 2 выніковыя перадачы.
Івіцы Оліч пакінуў маскоўскі ЦСКА
Харват Івіца Оліч пакінуў ЦСКА. Раней ён змяніў Віктара Ганчарэнку на пасадзе галоўнага трэнера. Оліч пакінуў ЦСКА з-за канфлікту з кіраўніцтвам клуба. Калі Оліч пачынаў працаваць з ЦСКА, клуб паабяцаў харвату, што ён будзе працаваць са зборнай Харватыяй ўсе тры матчы на Еўра. Але потым пазіцыя клуба памянялася. Да таго ж, Оліч быў незадаволены, што яму не далі запрасіць у штаб Рахіміча. Разумення па селекцыі ў трэнера і кіраўніцтва таксама не было”. Пра гэта „Чэмпіянату” паведаміла крыніца, знаёмая з сітуацыяй. Оліч узначаліў каманду ў красавіку. Выканаўцам абавязкаў галоўнага трэнера прызначаны Аляксей Беразуцкі.
„Сталіца” выйшла наперад у серыі за бронзу чэмпіянату Беларусі па міні-футболе
Спартоўцы мінскай „Сталіцы” перамаглі гомельскі БЧ ў стартавым паядынку за бронзавыя медалі чэмпіянату Беларусі па міні-футболе. Па ходу паядынку ў мінскім Палацы спорту „Уручча” гамяльчане тройчы вялі ў ліку, але не змаглі ўтрымаць перавагу, і асноўны час гульні завяршыўся ўнічыю – 3:3. У авертайме нікому не ўдалося вызначыцца, а ў серыі пасляматчавых пенальці поспех спадарожнічаў „Сталіцы” – 5:3. Другая сустрэча серыі да дзвюх перамог адбудзецца 19 чэрвеня ў Гомелі.
Вікторыя Азаранка выйшла ў 1/8 фіналу турніру ў Берліне
Беларуская тэнісістка Вікторыя Азаранка паспяхова стартавала ў адзіночным разрадзе турніру катэгорыі WTA-500 у Берліне з прызавым фондам 565,5 тысяч даляраў. У стартавым паядынку экс-першая ракетка планеты перамагла ў дзвюх партыях немку Андрэа Петкавіч – 6:4, 7:6 (7: 2).
Хакейны клуб „Дынама-Маладзечна” ўзначаліць Арцём Батвенкоў
Хакейны клуб „Дынама-Маладзечна” ўзначаліць Арцём Батвенкоў. Спецыяліст доўга працаваў у клубнай сістэме і ў сезоне 2020/2021 прывёў да чэмпіёнства ў вышэйшай лізе „Мінскіх зуброў”. Раней Арцём Батвенкоў, якому 18 чэрвеня спаўняецца 37 гадоў, працаваў трэнерам у школе „Дынама” з 2007 года. Сярод яго выхаванцаў – задрафтаваны ў 2019-м „Фларыдай” Уладзіслаў Калячонок. На працягу двух мінулых гадоў спецыяліст быў галоўным трэнерам „Мінскіх зуброў.
Беларускае Радыё Рацыя
