Футбол. Эстонія – Беларусь – 1:2
Футбольная зборная Беларусі правяла свой першы афіцыйны матч пад кіраваннем трэнера Міхаіла Мархеля. У Эстоніі ў адборавым матчы чэмпіяната Еўропы Беларусь перамагла дружыну гаспадароў – 2:1.
Першы тайм быў не асабліва багаты на падзеі і на гульнёвыя фарбы. Прайшоў ён з пераменай ініцыятывы, але па-сапраўднаму голавых момантаў амаль не было. Міхаіл Мархель значна абнавіў шэрагі зборнай, таму цікава было паглядзець як выявяць сябе маладыя хлопцы на міжнародным роўні. Варта яшчэ адзначыць беларускіх заўзятараў з нацыянальнымі сцягамі на трыбунах.
Другая палова сустрэчы выдалася досыць яркай. Спярша прыгожы гол забілі беларусы – капітан каманды Ігар Стасевіч выканаў класны навес, а абаронец Мікіта Навумаў галавой „прашыў” галкіпера эстонцаў. Аднак эйфарыя не давяла да дабра нашу каманду. Вельмі хутка гаспадары поля скарысталіся правалам абароны Беларусі і параўнялі лік.
Выхад на замену маладога Івана Бахара істотна ажывіў атаку Беларусі. Некалькі разоў эстонцаў ратавалі штанга і папярэчына. І ўсё ж у даданы час беларусы дамагліся вікторыі. Камбінацыю, якую пачаў Стасевіч, прадоўжыў прастрэлам Матвейчык, а яшчэ адзін рэзервіст Максім Скавыш завяршыў, пратыкнуўшы ў падзенні мяч у сетку. Гэта здарылася ўжо ў даданы час. Першая і заслужаная перамога Беларусі ў бягучым еўраадборы.
Беларусь выступіла ў матчы такім складам: Гутар — Матвейчык, Паліцевіч, Навумаў, Палякоў — Яблонскі, Маеўскі — Кавалёў (Скавыш, 76), Драгун, Стасевіч — Сігневіч (Бахар, 64).
У іншым матчы гэтай групы Германія прымала Нідэрлянды, выйгравала цягам гульні 1:0, але ўсё ж саступіла „аранье” – 2:4.
Турнірнае становішча ў групе С: 1. Паўночная Ірляндыя – 12 ачкоў (4 матчы), 2. Германія – 9 (4), 3. Нідэрлянды – 6 (3), 4. Беларусь – 3 (5), 5. Эстонія – 0 (4).
Лідар групы G дружына Польшчы зазнала першыя страты ачкоў, прайграўшы на выездзе Славеніі – 0:2.
Беларускае Радыё Рацыя
