Ігнацік выйшаў у асноўную сетку тэніснага турніру ў Спліце
Беларускі тэнісіст Уладзімір Ігнацік, які мае 353-ці нумар сусветнага рэйтынгу, прабіўся ў асноўную сетку турніру серыі „Чэленджэр” у харвацкім Спліце.
У другім кваліфікацыйным раўндзе беларус адолеў ў двухсэтавым паядынку прадстаўніка кітайскага Тайбэя Ву Тун-Ліна – 7:6 (7: 1), 6:3. На старце кваліфікацыі Уладзімір Ігнацік без праблем перайграў нідэрландскага тэнісіста Міка Вельдхеера – 6:1, 6:3. Сёння ў 1/16 фіналу супернікам беларускага тэнісіста будзе аўстраліец Алекс Болт, які мае 185-ы радок сусветнага рэйтынгу.
Яшчэ адзін беларускі тэнісіст Ягор Герасімаў паспяхова стартаваў на турніры ў італьянскім Кальяры з прызавым фондам 408,8 тысяч еўра. У паядынку першага раўнда адзіночнага разраду беларус, які займае 80-е месца ў сусветным рэйтынгу, абыграў у двух партыях аргентынца Гвіда Пелью, у якога 48-я пазіцыя, – 6:4, 6:0.
Дзмітрый Іваноў заняў 10-е месца на чэмпіянаце Еўропы ў Маскве
Беларускі цяжкаатлет Дзмітрый Іваноў заняў 10-е месца на чэмпіянаце Еўропы, які праходзіць у Маскве, з сумай двубор’я 285 кг (130 у рыўку + 155 у штуршку). Па выніках рыўка ён заняў 10-е месца. Па выніках штуршка — 11-е. Чэмпіёнам Еўропы стаў турак Мухамед Азбек з сумай 323 кг.
Пунтус першым дабраўся да адзнакі 500 матчаў у вышэйшай лізе ў якасці галоўнага трэнера
Спецыяліст Юрый Пунтус першым дабраўся да адзнакі 500 матчаў у вышэйшай лізе ў якасці галоўнага трэнера. У элітным дывізіёне ён кіраваў пяццю клубамі – барысаўскім БАТЭ, сталічным МТЗ-РІПА, берасцейскім «Дынама», мазырскай «Славіяй» і жодзінскім «Тарпеда-БелАЗам». Услед за Пунтусам па ліку матчаў у чэмпіянатах размясціліся Валеры Стральцоў – 366, Сяргей Саладоўнікаў – 356, Анатоль Юрэвіч – 325, Вячаслаў Акшаеў — 321 ды Ігар Кавалевіч – 308, паведамляе «Прессбол».
«Барселона» на апошніх хвілінах вырвала перамогу ў матчы з «Вальядалідам»
У матчы 29-га тура іспанскай Прымеры «Барселона» прымала «Вальядалід». Сустрэча праходзіла на стадыёне «Камп Ноў» у Барселоне і завяршылася з лікам 1:0. На працягу ўсяго матчу «Барселона» валодала гульнявой перавагай. У першым тайме сіне-гранатавыя стварылі некалькі галявых момантаў, але рэалізаваць іх не здолелі. У другім тайме гаспадары нарасцілі ціск і мелі яшчэ некалькі шанцаў вызначыцца. Рэалізаваць атрымалася толькі адзін з момантаў – на 90-й хвіліне пераможны і адзіны гол каталонцаў забіў Усман Дэмбеле.
З 79-й хвіліны «Вальядалід» гуляў у меншасці. «Барселона», набраўшы ў 29 матчах 65 ачкоў, займае другое месца ў турнірнай табліцы. У актыве мадрыдскага «Рэала», які ідзе на трэцім месцы, 63 ачкі. Лідыруе ў чэмпіянаце «Атлетыка», у якога 66 балаў.
Антон Разумоўскі, Беларускае Радыё Рацыя
Фота: pressball.by
