Ілля Лукашэвіч на правах арэнды перайшоў у салігорскі «Шахцёр»
Абаронца Ілля Лукашэвіч на правах арэнды перайшоў у салігорскі «Шахцёр» з сербскага «Пралетэра». Тэрмін арэнды – да канца сезону.
Футбаліст з’яўляецца выхаванцам футбольнага клуба «Мінск», у якім ён і пачаў сваю прафесійную карʼеру. У пачатку 2019 года перайшоў у «Тарпеда» -БелАЗ, у сярэдзіне таго ж сезону адправіўся ў «Пралетэр».
Мае на сваім рахунку 9 матчаў за маладзёжную зборную Беларусі, адзначае афіцыйны сайт «Шахцёра».
Экс-абаронца БАТЭ на правах вольнага агента перайшоў у «Легію»
Варшаўская «Легія» паведаміла аб пераходзе сербскага абаронцы Філіпа Младзенавіча. Кантракт падпісаны тэрмінам на тры гады, перадае sportowefakty.wp.pl. Гулец перайшоў у «Легію» на правах вольнага агента, пасля таго як скончылася пагадненне з «Лехіей». Младзенавіч за 86 гульняў у «Лехіі» забіў 3 галы і зрабіў 16 галявых перадач. Раней Філіп гуляў у «Стандардзе», «Кёльне», БАТЭ і «Црвене Звездзе». Таксама ён мае на сваім рахунку 10 матчаў за зборную Сербіі. Младзенавіч стаў другім былым гульцом БАТЭ ў «Легіі». У дадзены момант за клуб з Варшавы выступае Валерʼяну Гвілія.
Трэнер БАТЭ Андрэй Дрозд зноў дыскваліфікаваны
Федэрацыя футбола дыскваліфікавала трэнера брамнікаў Андрэя Дразда яшчэ на адзін матч чэмпіянату Беларусі, пра што паведаміла на сайце арганізацыі. Прычынай, па звестках by.tribuna.com, стала тое, што трэнер перад гульнёй выйшаў на поле атрымаць сертыфікат для ўдзелу свайго клуба ў еўракубках, хоць не меў права знаходзіцца на матчы з-за дыскваліфікацыі. Саму гульню Дрозд глядзеў з трыбун і ў распранальні не зʼяўляўся, аднак Дысцыплінарны камітэт палічыў выхад Дразда па сертыфікат парушэннем і прагаласаваў за дыскваліфікацыю спецыяліста.
Найменш у трох гульцоў берасцейскага «Дынама» падазрэнне на каронавірус
Адзін з лідараў каманды Аляксандр Наёк знаходзіцца ў шпіталі з пнеўманіяй. Пра гэта паведаміў телеграм-канал «Родны футбол. Футбол Беларусi». Дакладнай інфармацыі аб іншых хворых у камандзе на дадзены момант няма. Як звычайна, падобныя навіны даводзіцца даведвацца з неафіцыйных крыніц, – гаворыцца ў паведамленні.
«Манчэстар Сіці» разграміў «Ліверпуль» у матчы АПЛ
У матчы 32-га тура чэмпіянату Англіі «Манчэстар Сіці» разграміў «Ліверпуль» з лікам 4:0. Сустрэча адбылася ў Манчэстэры. Лік быў адкрыты ў сярэдзіне першага тайма – на 25-й хвіліне аўтарам забітага мяча стаў Кевін Дэ Бройнэ, які рэалізаваў 11-метровы. На 35-й хвіліне перавагу «гараджан» павялічыў Рахім Стэрлінг з перадачы Філіпа Фодэна. У канцоўцы першага тайма лік да буйнога давёў Фодэн з перадачы Дэ Бройнэ. У другім тайме гол у сваю браму забіў паўабаронца «Ліверпуля» Алекс Окслейд-Чэмберлен.
«Манчэстар Сіці», набраўшы 66 ачкоў, займае другое месца ў АПЛ. «Ліверпуль» мае 86 ачкоў і ўжо датэрмінова забяспечыў сабе чэмпіёнства. »Шэфілд Юнайтэд« на сваім полі ўпэўнена абыграў »Тотэнхэм« – 3:1. У матчы 33-га тура чэмпіянату Іспаніі мадрыдскі «Рэал» абыграў «Хетафе» з лікам 1:0. Адзіны гол быў забіты на 79-й хвіліне, вызначыўся Серхіа Рамас, які рэалізаваў 11-метровы. Такім чынам, «Рэал» святкаваў шостую перамогу. Набраўшы 74 ачкі, ён лідыруе ў турнірнай табліцы іспанскага нацыянальнага чэмпіянату. Адрыў «Каралеўскага клуба» ад «Барселоны» складае чатыры ачкі.
БГК стартуе матчам з «Вардарам» у групе Лізе чэмпіёнаў
Вызначаны расклад матчаў групы «А» гандбольнай Лігі чэмпіёнаў-2020/21. БГК імя Мяшкова стартуе хатнім паядынкам з «Вардарам» 16 або 17 верасня, інфармуе клубная прэс-служба.
Міжнародная федэрацыя хакея назвала шэсць лепшых гульцоў усіх часоў
Міжнародная федэрацыя хакея (ІІХФ) апублікавала вынікі выбару сімвалічнай зборнай лепшых хакеістаў у гісторыі. У сімвалічны склад па выніках галасавання заўзятараў трапілі брамнік Артур Ірбэ, абаронцы Сандзіс Озаліньш і Карліс Скрасціньш, а таксама тры форварды: Сяргей Жолтак, Уэйн Грэцкі і Ярамір Ягр. «Ягр і Грэцкі былі вельмі папулярныя ў галасаванні, інакш уся зборная складалася б з латвійцаў», – гаворыцца ў твітэры ІІХФ. Адзначым, што гэта не першы выпадак, калі заўзятары праяўляюць сваю актыўнасць у галасаванні федэрацыі.
Беларускае Радыё Рацыя
Фота: twitter.com
Глядзіце таксама
