Лявон Анацка: Наш марафон працягваецца
Жыхар Ліды Лявон Анацка пачаў удзельнічаць у шматдзённых марафонах ва ўзросце пяцідзесяці пяці гадоў. За чатыры гады свайго ўдзелу ў разнастайных міжнародных спаборніцтвах па марафоне, ён наладзіў добрыя кантакты са спартоўцамі з розных краін.
На фота: Лявон Анацка (справа)
Цяпер жа, дзякуючы лідскім уладам і ўласным высілкам Лявон Анацка праводзіць шматэтапны, першы ультрамарафон у Беларусі.
РР: Вы былі ініцыятарам таго, каб у кантакце з лідскімі ўладамі арганізаваць фактычна першы ў Беларусі шматдзённы марафон.
Лявон Анацка: Сказаць па-праўдзе, гэты наш марафон яшчэ не скончыўся, бо мы правялі толькі два этапы па двое сутак. І перад Новым годам у нас будзе трэці этап – асноўны. У нас цікавая сітуацыя зараз, мы акрамя асабістых вынікаў, падводзім вынікі паміж клубамі і краінамі. І пасля двух этапаў ідзе спаборніцтва паміж Беларуссю, Украінай і Расеяй. На трэцім этапе будзе ўсё вырашацца. Без дапамогі ўладаў Гарадзенскай вобласці і лідскіх уладаў, гэтага не адбылося б. Таму чарговы раз хачу словы ўдзячнасці сказаць.
РР: Вы, як сябра ТБМ, імкнуліся беларусізаваць гэтае міжнароднае мерапрыемства.
Лявон Анацка: Я шмат на якіх бываў мерапрыемствах, але не так часта бачыў, каб на медалях быў надпіс па-беларуску. Дзве мовы ў нас роўныя, як кажуць. Таму трэба і сваю мову падымаць, беларускую, да роўня расейскай.
РР: Узнагароды на марафоне будуць па-беларуску?
Лявон Анацка: Нашыя ўзнагароды былі і будуць па-беларуску. І адкрыццё, і выступы ў нас былі на беларускай мове. На першым этапе нам і песні спявалі па-беларуску. Я спадзяюся, што на закрыцці мы таксама штосьці цікавае прыдумаем.
Цалкам матэрыял у далучаным гукавым файле:
Якуб Сушчынскі, Беларускае Радыё Рацыя
