Шахматны турнір у Саколцы
Больш за сотню гульцоў прыняла ўдзел у пятых па ліку спаборніцтвах „Шахматы без межаў” у Саколцы, што на Беласточчыне.
Арганізатарам з’яўляецца сакольскі клуб LUX ORIENT. Сярод удзельнікаў ёсць і беларуская чэмпіёнка па шахматах Ірына Худая.
– Увогуле, я чэмпіёнка Беларусі па шахматах. З майго клуба прыехала 20 чалавек. Я прывезла шмат дзетак. Нам вельмі падабаецца. Выдатная арганізацыя турніраў. Раз на месяц мы стараемся прыехаць у Беласток ці Саколку, а таксама арганізоўваем свае турніры, на якіх вельмі хочам бачыць польскіх спартоўцаў. Падтрымліваем кантакт з Саколкай і Беластокам.
Як падкрэсліваюць арганізатары, самыя вышэйшыя месцы ў спаборніцтвах займаюць гульцы з Беларусі, як кажа старшыня клуба LUX ORIENT Войцех Зайкоўскі.
– Тут кожны можа згуляць, бо няма абмежаванняў. Найлепшыя – вялікая група спартоўцаў у Гародні. Яны займаюць першыя месцы. Гэта пяты міжнародны турнір у Саколцы. Цяпер маем рэкордную суму ўдзельнікаў – 103, з іх 27 – з Гародні.
Гульцы за шахматнымі сталамі сустрэнуцца пад канец лютага ў Гародні.
Уля Шубзда, Беларускае Радыё Рацыя, Саколка
Фота аўтаркі
