«Шахцёр» прайшоў у 3-ці раўнд Лігі Еўропы
Футбалісты „Шахцёра” згулялі ўнічыю ў гасцях з дацкім „Эсб’ергам” – 0:0 і выйшлі ў 3-ці раўнд кваліфікацыі Лігі Еўропы.
Пасля перамогі ў Салігорску з лікам 2: 0 галоўны трэнер беларусаў Сяргей Ташуеў зрабіў акцэнт на абарону. Дацкая каманда мела некалькі шанцаў, каб адкрыць лік. У канцоўцы сустрэчы „Шахцёр” правёў некалькі небяспечных нападаў, якія маглі завяршыцца ўзяццем брамы „Эсб’ерга”, але футбалістам з Салігорска не хапіла дакладнасці пры завяршальных ударах. У 3-м раўндзе кваліфікацыі супернікам салігорскага „Шахцёра” стане італьянскі „Тарына”. Першы матч пройдзе 8 жніўня ў гасцях, а 15 жніўня гульня адбудзецца ў Салігорску.
«Пяст» вылецеў з Лігі Еўропы
Казахстанская „Астана” з беларускім паўабаронцам Іванам Маеўскім у складзе выйграла на сваім полі ў андорскага клуба „Санта-Калома” з лікам 4:1. У шэрагах пераможцаў хет-трык аформіў харвацкі легіянер Марын Томас. У першай гульні, якая адбылася тыдзень таму ў Андоры, супернікі разышліся мірам – 0:0. Наступным апанентам „Астаны” будзе мальтыйская „Валета”. У матчы ў адказ „Рыга” на хатняй арэне перамагла „Пяст” – 2:1. Першая сустрэча скончылася з лікам 3: 2 на карысць польскага клуба. Такім чынам, у наступны раўнд па суме дзвюх сустрэч прабілася латвійская каманда.
Канцавы далучыцца да Карніцкага ў „Мезекевешд-Жоры”
Паўабаронца „Дняпра” Арцём Канцавы на правах арэнды да канца сезона перайшоў у клуб наймацнейшага вугорскага дывізіёна „Мезекевешд-Жоры”. Кіраўніцтва і трэнерскі штаб магілёўскага клуба былі таксама зацікаўлены ў паслугах Арцёма, але не сталі перашкаджаць жаданню футбаліста паспрабаваць свае сілы ў замежным чэмпіянаце, адзначае прэс-служба клуба „Дняпро”. У бягучым сезоне Канцавы правёў за „Дняпро” (у чэмпіянаце і Кубку) 6 матчаў і вызначыўся 2 выніковымі перадачамі. Адзначым, што ў клубе „Мезекевешд” выступае іншы беларус Аляксандр Карніцкі.
Азаранка прайграла Векіч у Сан-Хасэ
Беларуская тэнісістка Вікторыя Азаранка не змагла прабіцца ў чвэрцьфінал турніру ў амерыканскім Сан-Хасэ. У паядынку 1/8 фіналу беларуска саступіла харвацкай тэнісістцы Доне Векіч у двух сэтах – 4: 6, 3: 6. Сустрэча працягвалася 1 гадзіну 25 хвілін. На старце турніру Вікторыя Азаранка перайграла прадстаўніцу Францыі Армані Тан – 6: 2, 6: 4. У матчы за выхад у паўфінал Дона Векіч сустрэнецца з амерыканкай Крысці Ан.
Біятланісты правядуць збор у Італіі
Зборная Беларусі па біятлоне адправілася ў італьянскі Антхольц на вучэбна-трэніровачны збор, які працягнецца да 21 жніўня.
Склад каманды апублікавала прэс-служба Беларускай федэрацыі біятлона. Склад жаночай каманды: Ірына Крыўко, Дынара Алімбекава, Ганна Сола, Ірына і Алена Кручынкіны. Мужчыны: Раман Елетнаў, Сяргей Бачарнікаў, Антон Смольскі, Максім Верабей, Віктар Крыўко, Дзмітрый Лазоўскі і Мікіта Лабастаў.
Беларусы згуляюць з чэхамі на старце ЧС па хакею
Стаў вядомы першы супернік беларусаў на Чэмпіянаце свету-2020 па хакеі. Міжнародная федэрацыі хакея апублікавала каляндар гульняў сусветнага форуму, які пройдзе з 8 па 24 траўня 2020 года ў Швейцарыі.
Зборная Беларусі трапіла ў групу «А», дзе яе супернікамі стануць Чэхія, Швецыя, Славакія, Канада, Нямеччына, Данія і Велікабрытанія. Свае матчы беларусы будуць праводзіць у Лазане. Зборная Беларусі пачне турнір сустрэчай з чэхамі.
Антон Разумоўскі, Беларускае Радыё Рцыя
Фота: Прессбол
