У чэмпіянаце Беларусі па хакеі стартавала другая стадыя
У беларускай хакейнай экстралізе стартавала другая стадыя рэгулярнага чэмпіянату. Этап складаецца з 10 тураў і працягнецца да 26 лютага. Другі этап рэгулярнага сезона адкрыўся матчамі клубаў з ніжняй шасцёркі, якія вядуць барацьбу за дзве астатнія пуцёўкі ў плэй-оф. У абедзвюх гульнях чацвярга для выяўлення наймацнейшага камандам не хапіла трох перыядаў. Асноўны час паядынку „Дынама-Маладзечна” – „Ліда” завяршыўся з лікам 3:3, а ў авертайме поспех быў на баку гаспадароў: пераможны кідок нанёс Аляксандр Сувораў. Гэтая параза стала для „Ліды” 14-й запар. У паралельным матчы гульцы „Лакаматыва” і „Брэста” за 60 хвілін і зусім не змаглі закінуць шайбу. Першую і адзіную шайбу гледачы ў Оршы ўбачылі толькі ў авертайме – перамогу „чыгуначнікам” прынёс Андрэй Перагуда. Таксама была запланаваная сустрэча „Хіміка” з „Магілёвам”, але ў сувязі з немагчымасцю навапалачан згуляць у матчы камандзе была залічана тэхнічная параза. Таксама не адбудзецца паядынак „Хіміка” і „Брэста”, прызначаны на 22 студзеня.
Расіянін Антон Бабікаў выйграў індывідуальную гонку на этапе Кубка свету па біятлоне.
Расійскі біятланіст Антон Бабікаў атрымаў перамогу ў індывідуальнай гонцы на сёмым этапе Кубка свету, які праходзіць у італьянскім Антхольцы. Бабікаў апынуўся адзіным сярод 103 удзельнікаў гонкі, які не дапусціў ніводнага промаху. Гэта вікторыя стала для расіяніна другой у кар’еры на этапах Кубка свету пасля трыумфу ў пасьюце ў Эстэрсундзе пяць гадоў таму. Раней спартовец не трапіў у асноўны склад зборнай Расіі на Алімпійскія гульні – 2022, на дадзены момант ён лічыцца ў камандзе як запасны.
9,7 секунды пераможцу прайграў Тар’яй Бе, які зарабіў дзве хвіліны штрафу. На другой пазіцыі нарвежац фінішаваў у абедзвюх індывідуальных гонках цяперашняга сезона, дзякуючы чаму стаў уладальнікам Малога крыштальнага глобуса ў гэтай дысцыпліне. На трэцім радку размясціўся яшчэ адзін прадстаўнік Расіі Саід Карымула Халілі, які раней не ўздымаўся на подыум этапаў Кубка свету ў асабістых гонках.
Расейскія гандбалісты прайгралі шведам у асноўным этапе чэмпіянату Еўропы
У сталіцах Венгрыі і Славакіі стартаваў асноўны этап 15-га мужчынскага чэмпіянату Еўропы па гандболе. У першым матчы 2-й групы гандбалісты Расіі прайгралі ў Браціславе камандзе Швецыі 23:29. Таксама зборная Германіі прайграла дзеючым чэмпіёнам Старога Свету іспанцам 23:29, а палякі саступілі уладальнікам бронзавых узнагарод мінулага кантынентальнага першынства нарвежцам 28:30.
На Кубку Афрыканскіх нацый па футболе сфармаваны ўсе пары 1/8 фіналу
На Кубку Афрыканскіх нацый па футболе, які праходзіць у Камеруне, сфармаваны ўсе пары адной восьмай фіналу.
Плей-оф турніру стартуе ў нядзелю матчам зборных Буркіна-Фасо і Габона, у гэты ж дзень за праход у чвэрцьфінал паспрачаюцца Нігерыя і Туніс. 24 студзеня каманда Гвінеі сустрэнецца з Гамбіяй, а гаспадары турніру камерунцы праэкзаменуюць футбалістаў з Каморскіх выспаў. Днём пазней зборная Сенегала будзе змагацца з Каба-Вэрдэ, таксама ў праграме аўторка паядынак каманд Марока і Малаві. Першы раунд плэй-оф Кубка Афрыканскіх нацый завершыцца 26 студзеня матчамі Кот-д’Івуар – Егіпет і Малі – Экватарыяльная Гвінея.
Беларускае Радыё Рацыя
