У жанры жорсткага „Порту”
Футбалісты БАТЭ з разгромнай паразы стартавалі ў групавой стадыі Лігі чэмпіёнаў, прапусціўшы ў гасцях ад партугальскага „Порту” ажно шэсць мячоў. Асабліва ўдала матч склаўся для Браімі, які забіў БАТЭ тры мячы. У гісторыі клуба гэта ўжо чацвёртая спроба сіл у асноўным раўндзе галоўнага клубнага турніру Еўропы. Але ніколі раней БАТЭ не трываў такіх зневажальных няўдач. Гэта самая буйная параза ў гісторыі выступаў БАТЭ ў групавой стадыі Лігі чэмпіёнаў. Нават іспанскай „Барселоне” 28 верасня 2011 года “батээраўцы” саступалі сціплей 0:5 Наогул жа ў еўракубкавай біяграфіі БАТЭ былі не менш балючыя прыніжэння. Прыкладам, у жніўні 1999 году ў кваліфікацыі Кубку УЕФА барысаўчане прайгралі на хатняй арэне маскоўскаму „Лакаматыву” з лікам 1:7.
У гэтым жа квартэце „Атлетык” з Більбао і данецкі „Шахцёр” згулялі ўнічыю з нулявым лікам.
Маскоўскі ЦСКА таксама пацярпеў разгромную паразу ад італійскай „Ромы” ў матчы першага тура групавога этапу Лігі чэмпіёнаў. Сустрэча, якая праходзіла ў Рыме, завяршылася з лікам 5:1 на карысць апенінцаў. „Армейцы” прапусцілі адразу чатыры мячы ў першыя паўгадзіны матчу. На шостай хвіліне вызначыўся Хуан Ітурбэ, затым двойчы забіў Жэрвіньё, а таксама голам адзначыўся абаронца Майкон. На старце другога тайма аўтагол на свой рахунак запісаў футбаліст расейскага клуба Сяргей Ігнашэвіч. Пад заслону сустрэчы „голам прэстыжу” вызначыўся форвард ЦСКА Ахмед Муса, усталяваўшы канчатковы лік – 5:1. У паралельным матчы групы Е мюнхенская „Баварыя” абыграла англійскі „Манчэстэр Сіці” 1:0. Адзіны мячу самым канцы матчу забіў абаронца Джером Баатэнг.
Таксама першыя гульні адбыліся ў квартэтах F, G і Н. „Барселона” аднаасобна ўзначаліла групу F дзякуючы перамозе над кіпрскім АПОЭЛам 1:0 і нічыі паміж „Аяксам” і ПСЖ 1:1. У квартэце G абодва матчы завяршыліся ўнічыю: „Чэлсі” згуляў з „Шальке” 1:1, з такім жа лікам скончылася сустрэча паміж славенскім „Марыбарам” і „Спортынгам”.
Беларускае Радыё Рацыя
