Вера Лапко выйшла ў чвэрцьфінал парнага разраду на турніры ў Індыян-Уэлсе
Беларуска Вера Лапко ў дуэце з чэшкай Барбарай Крэйчыкавай выйшла ў чвэрцьфінал у парным разрадзе на тэнісным турніры серыі „Чэленджэр” (прызавы фонд – $140 тыс.), які праходзіць у Індыян-Уэлсе (ЗША).
У матчы першага круга беларуска-чэшскі тандэм практычна не сустрэў супраціўлення з боку ўкраінкі Кацярыны Бандарэнка і прадстаўніцы ЗША Варвары Лепчанка і перамог саперніц у двух сэтах з аднолькавым лікам 6:0. У чвэрцьфінале Лапко і Крэйчыкава сустрэнуцца з пераможцамі процістаяння Айла Тамлянавіч (Аўстралія) / Вера Званарова (Расія) – Андрэа Петкавіч (Германія) / Франчэска Ск’явонэ (Італія).
У жаночым адзіночным разрадзе на гэтым жа турніры Вера Лапко не змагла пераадолець бар’ер кваліфікацыі. У першым матчы беларуска перайграла амерыканку Элі Кійк – 6:1, 6:0, а ў наступным раўндзе пацярпела паражэнне ад японскай тэнісісткі Місакі Доі – 6:7 (1), 3:6.
Гэты турнір завершыцца 4 сакавіка, а 7 сакавіка на кортах Індыян-Уэлса стартуе турнір катэгорыі „Прэм’ер”, арганізатары якога запрасілі згуляць беларускую тэнісістку Вікторыю Азаранка. У 2012 і 2016 гадах Вікторыя выйгравала гэтыя прэстыжныя спаборніцтвы.
