Зборная Беларусі дазналася супернікаў па адборы на Еўра-2020
Нідэрлянды, Германія, Паўночная Ірляндыя і Эстонія сталі супернікамі беларускай футбольнай зборнай у адборачным турніры чэмпіянату Еўропы 2020 года. Лёсаванне прайшло 2 снежня ў Дубліне, паведамляе БелаПАН.
Гэтыя каманды згуляюць у групе С.
З Галяндыяй беларуская каманда сустракалася ў кваліфікацыі чэмпіянатаў Еўропы 1996 года, 2004 і 2008 гадоў, чэмпіянату свету 2018 года (2 перамогі, 6 паражэнняў, розніца мячоў 5-17).
Эстонія была супернікам зборнай Беларусі ў кваліфікацыі ЧС-1998 (1 перамога, 1 паражэнне, 1-1). Яшчэ тры разы яны сустракаліся ў таварыскіх матчах (1 перамога, 2 паражэнні, 3-4).
З Германіяй і Паўночнай Ірляндыяй Беларусь згуляе ў кваліфікацыі ўпершыню. У яе летапісе па адным таварыскім матчы (з немцамі — нічыя 2:2 у 2008 годзе, з паўночнаірландцамі — паражэнне 0:3 у 2016 годзе).
Склад астатніх груп:
А — Англія, Чэхія, Балгарыя, Чарнагорыя, Косава;
В — Партугалія, Украіна, Сербія, Літва, Люксембург;
D — Швайцарыя, Данія, Ірляндыя, Грузія, Гібралтар;
Е — Харватыя, Уэльс, Славакія, Венгрыя, Азербайджан;
F — Іспанія, Швецыя, Нарвегія, Румынія, Фарэрскія а-вы, Мальта;
G — Польшча, Аўстрыя, Ізраіль, Славенія, Македонія, Латвія;
H — Францыя, Ісляндыя, Турцыя, Албанія, Малдова, Андора;
I — Бельгія, Расея, Шатляндыя, Кіпр, Казахстан, Сан-Марына;
J — Італія, Боснія і Герцагавіна, Фінляндыя, Грэцыя, Арменія, Ліхтэнштайн.
Па выніках двухкругавога турніру, які пачнецца ў сакавіку 2019 года, дзве лепшыя каманды кожнай групы выйдуць у фінальную частку Еўра-2020. Яшчэ чатыры пуцёўкі будуць разыграныя ў Лізе нацый, дзе па выніках групавога раўнда працягвае змаганне беларуская зборная.
Фінальная частка Еўра-2020 пройдзе ў 12 краінах Еўропы з 12 чэрвеня па 12 ліпеня. Вырашальны матч адбудзецца ў Лондане.
Глядзіце таксама
