„Зубры” без шанцаў супраць „Аўтамабіліста”
Хакеісты „Дынама-Менск” прайгралі екацярынбургскаму „Аўтамабілісту” у Кубку Латвійскай чыгункі. Турнір праходзіць у Рызе.
На першай жа хвіліне матчу нападнік „Аўтамабіліста” Мэйсек Брукс паспяхова атакаваў брамку «зуброў». У сярэдзіне першага перыяду гулец аформіў дубль, на 18-й хвіліне супрацьстаяння форвард Мікіта Сетдзікаў падтрымаў партнёра па камандзе – 3: 0.
У пачатку другога перыяду Мэйсек Брукс аформіў хет-трык. Кропку ў матчы паставіў нападнік „Аўтамабіліста” Піцер Холанд, які забіў у брамку „зуброў” дзве шайбы запар — 6:0. Наступны матч менчукі правядуць 24 жніўня супраць „Дынама-Рыга”. 12-ы па ліку сезон у Кантынентальнай лізе стартуе 1 верасня.
Сабаленка згуляе з Азаранкай у першым раўндзе US Open
Два беларускія тэнісісты прабіліся ў трэці кваліфікацыйны раўнд адкрытага чэмпіянату ЗША. У другім раўндзе Ягор Герасімаў сустракаўся з амерыканскім тэнісістам Мітчэлам Кругерам і перамог у трохсэтавым паядынку – 6:3, 5:7, 6:4. Ілля Івашка перайграў у 2-м раўндзе бельгійца Рубена Бемельманса – 6:4, 6:3. Апошні ў сезоне турнір серыі „Вялікага шлема” пройдзе ў Нью-Ёрку з 26 жніўня па 8 верасня. Тым часам прайшло лёсаванне першага раўнда US Open. У жаночым адзіночным разрадзе выступяць 3 беларускія тэнісісткі. Першай суперніцай дзевятай ракеткі планеты Арыны Сабаленкі будзе Вікторыя Азаранка, якая займае цяпер 41-е месца ў сусветным рэйтынгу. Аляксандра Сасновіч, у якой 45-я пазіцыя ў рэйтынгу WTA, сустрэнецца з амерыканкай Джэніфер Брэдзі. Сёлета агульны прызавы фонд US Open складае 57 мільёнаў 200 тысяч даляраў.
Беларускі мінімальна абыгралі румынак на Еўрабаскеце
Баскетбалісткі юнацкай зборнай Беларусі пераможна пачалі суцяшальны турнір за 9-16-е месцы ў дывізіёне В першынства Еўропы ў Сафіі. Падначаленыя Вольгі Падабед сустракаліся з камандай Румыніі і выйгралі з мінімальнай перавагай – 53:52. Самай выніковай у складзе дружыны стала Уладзіслава Кушнер, якая набрала 13 ачкоў. Сёння беларускі згуляюць з баскетбалісткамі Ізраіля.
Антон Разумоўскі, Беларускае Радыё Рацыя
