На Данбасе па-ранейшаму складаная гуманітарная сітуацыя (абноўлена)

таму

Выдрукаваць Пракаментаваць (0) Падзяліцца

Паводле экспертаў ААН у многіх месцах не хапае неабходных прадуктаў, медыкаментаў, знішчана інфраструктура.

У сваю чаргу расейскія і украінскія СМІ паведамляюць, што пастаўляюць гуманітарную дапамогу у падкантрольныя прарасейскім баевікам раёны Ўсходу Украіны.

На сённяшні дзень у Данецку і ваколіцах гуманітарная дапамога аказваецца некаторымі украінскімі алігархамі, а “гуманітарныя канвоі з Расеі” у Данецку мала хто бачыў, кажа жыхарка Данецка Марыя Пятроўская.

– Калі гаварыць пра расейскую гуманітарную дапамогу, то да звычайных людзей яна часцей за ўсё не даходзіць. Цяперашняе кіраўніцтва Данецку і вайскоўцы ў Данецку яе забіраюць сабе і перапрадаюць у крамах. Да людзей простых гуманітарная дапамога не даходзіць альбо даходзіць у вельмі малой колькасці.

Расейскія СМІ паведамляюць пра тое, што на Данбас з лета мінулага году Расея накіравала 26 гуманітарных канвояў. Афіцыйны Кіеў кажа, што пад прыкрыццём гуманітарнай дапамогі на Ўсход Украіны пастаўляецца зброя.

Зміцер Косцін, Беларускае Радыё Рацыя

* * *

На Данбасе пачалася сапраўдная гуманітарная катастрофа. Гэта канстатаваў старшыня маніторынгавай камісіі АБСЕ ва Украіне Майкл Бацюркіў. Ва ўмовах вайны, якая доўжыцца на Данбасе больш за год, ці не большасць жылых дамоў у гарадах і селішчах ці разбураная цалкам, ці напаўразбураная.

Паведамляе наш кіеўскі карэспандэнт Марцін Война:

– Старыя, інваліды, жанчыны з немаўлятамі вымушаныя хавацца ў падвалах, бамбасховішчах і іншых падземных камунікацыях, непрыдатных для жыцця. Большасць вёсак і пасёлкаў, якія знаходзяцца ў прыфрантавой зоне, цалкам знішчаныя. Знішчаныя таксама вадавод і каналізацыя. Разбураныя электрычныя падстанцыі. Не працуюць аптэкі, бальніцы і паліклінікі. Банкаматы разрабаваныя і разбітыя. Ці не большасць крамаў зачыненыя ці спаленыя. У гарадах і пасёлках, кантралюемых прарасейскімі тэрарыстамі, небяспечна з’яўляцца на вуліцы. Прытым не толькі з прычыны артылерыйскіх абстрэлаў, але і з рызыкі быць расстралянымі без суда і следства.

Яшчэ год назад шмат хто з людзей, якія зараз жывуць у нечалавечых умовах, выходзілі на антыўкраінскія мітынгі, з брутальнымі заклікамі ўвесці ў краіну расейскія войскі і ліквідаваць украінскую дзяржаўнасць.

Але цяпер антыўкраінскія настроі паступова сыходзяць. Ні ЛНР, ні ДНР, ні расейскія войскі, на якія шмат хто на Данбасе спадзяваўся, нічога не робяць для ліквідацыі гуманітарнай катастрофы.