Беларуская дыяспара Беластока зладзіць Марш Годнасці
Беларуская дыяспара Беластока ў бліжэйшую нядзелю (7 жніўня) ладзіць Марш Годнасці. Шэсце прымеркаванае да другой гадавіны прэзідэнцскіх выбараў у Беларусі.
Чаму кожны беларус павінен прыйсці на марш? Каб паказаць усяму свету і беларусам унутры краіны, што старонка не перагорнутая, і мы надалей змагаемся, – кажа суарганізатар мерапрыемства, прадстаўнік беларускай дыяспары ў Беластоку Ян Абадоўскі:
-Змагаемся супраць дыктатуры, супраць гвалту і рэпрэсій, супраць ганебнага ўдзелу лукашэнкаўскага рэжыму ў вайне супраць Украіны. Мы хочам паказаць, што нас большасць і праз два гады мы надалей выходзім і будзем рабіць усё, каб нашая краіна была вольнай!
Маршы Годнасці Беларусаў пройдуць у шматклікіх гарадах, дзе апынулася беларуская дыяспара пасля жнівенскіх падзей 2020 года, каб выказаць сваю нязгоду з тым, што зараз адбываецца ў Беларусі і падтрымаць тых, якія апынуліся за кратамі.
Беластоцкі Марш Годнасці Беларусаў пройдзе у нядзелю, 7 жніўня. Пачатак а 16-тай гадзіне з Рынкку Касцюшкі.
Анна Шайкоўская, Беларускае Радыё Рацыя
