Беларускі эксперымент на беластоцкай сцэне
У сталіцы Падляшша паказам спектакля «Бетон» Рэспубліканскага тэатра беларускай драматургіі завяршыўся трэці фестываль «Напрамак Усход».
Беларускія акцёры не выпадкова завяршалі фестываль, паколькі даўно паміж беластоцкім тэатрам і Рэспубліканскім тэатрам беларускай драматургіі завязаліся цесныя творчыя сувязі. Гэтым разам з Менска прыехаў спектакль рэжысёра Яўгена Карнягі, які распавядае пра каханне, але называецца «Бетон».
– Такое проціпастаўленне старажытнагрэчаскаму міфу пра Арфея і Эўрыдыку. Такога кахання – манагамнага абсалютна – сучаснаму “бетоннаму” свету, калі ў цябе ёсць выбар, ёсць інтэрнэт, калі людзі жэняцца, выходзяць замуж па некалькі разоў. Калі новае і новае каханне: не атрымалася з адным, можна паспрабаваць заўсёды з іншым. “Бетон” – гэта для мяне ўвасабленне сучаснага свету.
Прэм’ера спектакля адбылася ў верасні 2017 года. На Рэспубліканскім конкурсе тэатральнага мастацтва “Нацыянальная тэатральная прэмія” ён атрымаў узнагароду «Лепшы эксперыментальны спектакль”. У рамках трэцяга фестывалю «Напрамак Усход» у Беластоку ад мінулай суботы адбылося 9 падзеяў. Выступалі творчыя калектывы з Польшчы, Украіны, Літвы і Грузіі. З Беларусі сваю творчасць прызентавалі Нацыянальны акадэмічны драматычны тэатр імя Янкі Купалы і Рэспубліканскі тэатр беларускай драматургіі.
Улад Грынеўскі, Беларускае Радыё Рацыя, Беласток
Фота rtbd.by
