Беларускія хоры на фестывалі царкоўнай музыкі „Гайнаўка-2016” (абноўлена)
Два беларускія хоры выступілі ў час конкурсных праслухоўванняў першага дня Міжнароднага фестывалю царкоўнай музыкі „Гайнаўка-2016”.
Сярод аматарскіх хораў выступіў лаўрэат 2009 года хор “Cantus Juventae” з Менска, з дырыжорам Паўлам Шэпелевым. У катэгорыі прыхадскіх хораў заспяваў камерны хор “Праабражэнне” з Барысава.
Гаўрылава Наталля, удзельніца хора “Праабражэнне”:
– Для кожнага з нас – гэта шлях да Бога, і калі мы спяваем духоўную музыку, мы адчуваем у душы свет, радасць.
Сябра журы фестывалю айцец Юры Шурбак:
– Трэба дасканала ведаць літаратуру, слова Божае, упрыгожанае мелодыяй і гармоніяй, і тады гэта дае эфект, які ўзрушвае чалавечыя сэрцы.
Дырыжор Павел Шэпелеў:
– У гэтым годзе мы зрабілі акцэнт на духоўную музыку, і ў асноўным рыхтавалі сольны канцэрт і конкурсную праграму. Але зусім нядаўна мы спявалі на рэспубліканскім фестывалі музыкі, і выконвалі беларускія народныя і сучасныя песні.
Сёння, 20 траўня, другі дзень конкурсных праслухоўванняў. Выступіць хор хлопчыкаў са Светлагорска. Пачатак а 17-й гадзіне ў памяшканні філармоніі па вуліцы Падлесьнай 2.
[Not a valid template]
* * *
Два беларускія хоры выступяць сёння ў час конкурсных праслухоўванняў Міжнароднага фестывалю царкоўнай музыкі „Гайнаўка-2016”. Госці фестывалю пачуюць дзесяць хораў між іншым з Латвіі, Славакіі, Аўстраліі ды Аб’яднаных Арабскіх Эміратаў. У катэгорыі прыхадскіх хораў заспявае камерны хор “Праабражэнне” з Барысава.
Сярод аматарскіх хораў пачуем таксама лаўрэата 2009 года хор “Cantus Juventae” з Менска, кажа дырэктар фестывалю Мікалай Бушко:
– Заспявае аматарскі хор, я маю на ўвазе нашага лаўрэата, славуты хор Лінгвістычнага ўніверсітэту з Менска, якім кіруе Павел Шэпелеў, які некалі прыязджаў да нас, вёў некалькі гадоў хор радыё.
Навінкай сённяшніх праслухоўванняў будзе хор праваслаўнага сабора святога Тамаша з Дубаю (Аб’яднаныя Арабскія Эміраты). Хор заспявае між іншым на стараарамейскай мове, на якой гаварыў Ісус Хрысос.
Пачатак конкурсных праслухоўванняў а 17-й гадзіне ў памяшканні філармоніі па вуліцы Падлесьнай 2.
Лукаш Леанюк, Беларускае Радыё Рацыя, Беласток
Глядзіце таксама
