Беларусы Беластока просяць выставіць творы Язэпа Драздовіча
Беларусы Беластока звярнуліся да дырэктара Падляшскага музея Вальдэмара Вільчэўскага з просьбай адрэстаўраваць і выставіць тэатральныя дэкарацыі Язэпа Драздовіча.
Пад супольным зваротам падпісаліся: старшыня Беларускага гістарычнага таварыства Алег Латышонак, кіраўніца фонду „Беларусь 2020” Марына Ляшчэўская, кіраўнік фонду Kamunikat.org Яраслаў Іванюк ды кіраўнік фонду Tutaka Павел Станкевіч.
Нагадаем, што ў 2015 годзе Галоўнае праўленне Беларускага грамадска-культурнага таварыства перадало тэатральныя дэкарацыі Падляшскаму музею ў Беластоку. Планавалася, што іх адрэстаўруюць і выставяць у музеі, аднак гэтага не адбылося. Тады старшыня БГКТ Ян Сычэўскі адзначаў, што перадача палотнаў спецыяльнай установе з’яўлялася апраўданай.
Дэкарацыя „Замчышча”
Дэкарацыя „Краявід”
Дэкарацыя „Пушча”
Дэкарацыя „Беларуская вёска з вуліцай”
Дэкарацыі былі створаны Язэпам Драздовічам для беластоцкай драматычнай секцыі Таварыства беларускай школы ў 1933, што было апісана ў яго дзённіку. Ім былі намаляваныя двухбаковыя палотны: „Беларуская вёска з вуліцай”, „Краявід”, „Пушча” і „Замчышча”.
Аляксей Трубкін, Беларускае Радыё Рацыя
