Беларусы Бельгіі сабралі гуманітарную дапамогу
Некалькі тон гуманітарнай дапамогі прывезлі беларусы Бельгіі ў Варшаву. Частку грузу яны пакінулі ў Цэнтры дапамогі беларускім добраахвотнікам пры Беларускім доме. У асноўным гэта сродкі экстраннай медычнай дапамогі, ды вайсковая амуніцыя. Другую частку дапамогі адвезлі ксяндзу Вячаславу Барку ў касцёл на плошчы Трох Крыжоў, дзе працуе пункт збору гуманітарнай дапамогі бежанцам з Украіны ды Беларусі.
Кажа ініцыятар збору дапамогі – кіраўнік Беларуска-еўрапейскага задзіночання Зміцер Піменаў:
– Я лічу сваім абавязкам дапамагаць кожнаму, каму патрэбна дапамога. Я ўдзячны ўсім беларусам, якія далучыліся да збору сродкаў на дапамогу тым, каму патрэбная гэта дапамога, хто ўцякае ад вайны, якую пачаў тэрарыст Пуцін.
Гуманітарная дапамога была сабраная дзякуючы ініцыятыве беларусаў, якія жывуць у Бельгіі, Францыі, Нідэрландах ды Нямеччыне. Гэта ўжо другая такая гуманітарная місія і па словах яе ініцыятараў – не апошняя. Па меры збору новых партый аўтамабілі з дапамогай бежанцам і беларускім добраахвотнікам будуць прыязджаць з Бельгіі ў Польшчу яшчэ і яшчэ.
Беларускае Радыё Рацыя
