Экскурсія па Беластоку, прысвечаная падзеям 1939 года
Беларускі гістарычны клуб Beer&History зладзіў экскурсію па вуліцах Беластока, прысвечаную падзеям 1939 года.
Удзельнікі шпацыру з гісторыкам Алесем Кіркевічам прайшліся вуліцай Ліповай ад касцёла Св. Роха да Рынка Касцюшікі, палаца Браніцкіх і тэатра імя Венгеркі, дзе ў свой час быў прыняты акт аб далучэнні Беласточчыны да СССР. На думку гісторыка, тое далучэнне стала трагедыяй для народаў, што тут пражывалі.
– Далучэнне да БССР, гэта не значыла, што Беларусі стала больш, што для беларусаў гэта было класна. Ні ў якім разе. Таму што рэпрэсіі, якія прыйшлі за савецкім салдатам, за салдацкім савецкім ботам, яны закранулі абсалютна ўсе катэгорыі насельніцтва – і праваслаўных, і каталікоў, і жыдоў, і палякаў, і ў тым ліку беларусаў. Таму гэтая падзея трагічная. І не трэба, як дурням цешыцца, о Беларусі прырасло, Беларусі стала больш. Савецкага саюза стала больш, а не Беларусі. І вось гэта вельмі важна памятаць і мець па гэтым пункце агульную пазіцыю – у беларусаў і палякаў. Бо гэтая падзея адназначна трагічная.
Не так даўно па гэтым экскурсійным маршруце гарадскімі ўладамі былі ўсталяваныя стэнды з архіўнымі фотаздымкамі вуліц Беластока ў 1939 годзе. Дзякуючы якім, кожны можа параўнаць, як выглядалі пад час тых падзеяў тыя ці іншыя вуліцы ды будынкі горада.
Цалкам матэрыял:
Юрась Дзяшук, Беларускае Радыё Рацыя
