Еўракамісія заклікала Польшчу дапусціць Frontex на мяжу з Беларуссю
Еўрапейская камісія заклікала Варшаву дазволіць супрацоўнікам Frontex працаваць на польска-беларускай мяжы, дзе ўжо загінулі чатыры мігранты пры спробе перасекчы мяжу ЕЗ.
Пра гэта ў пятніцу заявіў на прэс-канферэнцыі прадстаўнік Еўрапейскай камісіі, піша „Еўрапейская праўда” са спасылкай на Reuters.
„Мы прызнаем, што польскія ўлады маюць справу з цяжкай сітуацыяй. Сітуацыя была створана ў выніку спробы выкарыстоўваць людзей у палітычных мэтах”, – адзначыў спікер. Ён сказаў, што дазволіць доступ да мяжы пагранічным сілам ЕЗ Frontex было б „вельмі добрай ідэяй”.
Польшча пакуль заяўляе, што кіруе сітуацыяй, і не запрасіла дапамагаць Frontex.
Нагадаем, што Варшава ўвяла надзвычайнае становішча на сваёй мяжы з Беларуссю. Гэта азначае, што журналістам і праваабаронцам забаронена назіраць за тым, што там адбываецца.
У ноч на 24 верасня польскія памежнікі паведамілі пра смерць аднаго з мігрантаў у групе, якую яны затрымалі побач з беларускай мяжой.
Foto: BBC News
