Гарадзенцы далучыліся да Суветных дзён праваслаўнай моладзі
Супольна маліліся, гулялі і пазнавалі іншыя нацыянальныя культуры. Група маладых гарадзенцаў наведала Беласток з нагоды Суветных дзён праваслаўнай моладзі. Госці з Гародні паўдзельнічалі ў балі праваслаўнай моладзі і экскурсіі па Беласточчыне. Сусветныя дні праваслаўнай моладзі завяршыліся супольнай малітвай у царкве ў Паўночным Астровіі і вечарынай, на якой свае культуры прадстаўлялі замежныя госці.
Паводле дыякана Дзмітрыя Паўлюкевіча, вельмі карысныя для моладзі сустрэчы, на якіх можна пазнаёміцца з іншымі культурамі.
– Для моладзі вельмі важна мець кантакты з людзьмі з розных краінаў. Гэта добры досвед. Заўсёды, калі ты сустракаешся з людзьмі з іншых краінаў, пазнаеш нешта новае. Ды папросту гэта добра і весела.
Апрача маладых людзей з Беларусі, у Беласток прыехалі таксама ўдзельнікі з Літвы, Латвіі і Расеі.
Сусветны дзень праваслаўнай моладзі быў усталяваны ў 1992 годзе на дзень аднаго з 12-ці вялікіх праваслаўных святаў – Стрэчання Гасподняга. Мерапрыемства на Падляшшы арганізавала Брацтва праваслаўнай моладзі Беластоцка-Гданьскай епархіі.
Лукаш Леанюк, Беларускае Радыё Рацыя, Беласток
Фота nocowanie.pl
