У Супраслі прайшла сустрэча да гадавіны арыштаў кіраўніцтва Саюза палякаў Беларусі
Год таму з 23 па 25 сакавіка прайшлі арышты сярод кіраўніцтва Саюза палякаў у Беларусі. Старшыня Саюза Анжаліка Борыс і журналіст Анджэй Пачобут знаходзяцца за кратамі да гэтай пары. Іх трымаюць у СІЗА Жодзіна. Да гадавіны гэтай сумнай даты ў тэатры „Вершалін” у Супраслі адбылася тэматычная сустрэча. Панэльная дыскусія сабрала багата вядомых дзеячаў і палітыкаў. Адкрыла спатканне Анна Кетліньска, а вяла дыскусію Марыя Пшэломец.
Пасол Польшчы ў Беларусі ў выгнанні Артур Міхальскі мяркуе, што і Анжаліка і Анджэй ёсць героямі не толькі для польскай супольнасці, але і для Беларусі ўвогуле:
– Я глыбока веру ў тое, што яны, як вязні сумлення, не толькі як героі польскай прысутнасці ў Беларусі, але і героі ўсёй гэтай супольнасці, якая змагаецца за свабоду і гэтую свабоду атрымаюць. Спадзяюся, што не давядзецца доўга чакаць. Праблема ў тым, што мы ведаем, якая сітуацыя. Ведаем, хто кіруе ў Беларусі, які тэрор, колькі людзей трывае, рэжым не саступае, але не будзем губляць надзеі і чакаем свабоды.
Год таму былі таксама арыштаваныя актывісткі Саюза палякаў Ірэна Бярнацкая з Ліды, Марыя Цішкоўская з Ваўкавыску і Ганна Панішава з Берасця, якія праз два месяцы арышту, пры садзейнічанні польскага боку, былі вывезеныя з Беларусі без права вяртання. Анжаліка Борыс і Анджэй Пачобут адмовіліся пісаць прашэнне аб памілаванні. Усім удзельнікам так званай „справы палякаў” інкрымінуецца частка 3, артыкула 130 Крымінальнага кодэксу, „распальванне нацыянальнай варожасці і рэабілітацыя нацызму”.
Беларускае Радыё Рацыя
