IV Усходні эканамічны кангрэс у Беластоку (абноўлена)
Усходні эканамічны кангрэс: канкрэтныя дамовы для мясцовага бізнесу. Цягам двух дзён у сталіцы Падляшша праходзіў эканамічны форум, у рамках якога бізнесоўцы, чыноўнікі і эксперты не толькі дыскутавалі на розныя тэмы, але і праводзілі перамовы.
Пра канкрэтныя інвестыцыі дамовіліся прадстаўнікі канцэрна „Мясамолпром” з Берасця. Паведаміў Генеральны дырэктар берасцейскага аддзялення Беларускай гандлёва-прамысловай палаты Валерый Лабун:
– У гэтай залі быў падпісаны мемарандум паміж адным з польскіх прадпрыемстваў ды прадстаўнікамі канцэрна „Мясамолпром” Берасцейскай вобласці, пра інвеставанне ў адзін з праектаў, які размешчаны ў горадзе Ляхавічы Берасцейскай вобласці. На падыходзе яшчэ некалькі такіх цікавых праектаў, таму сёння гэта рэальная магсымасць.
Беларускі бізнес цікавіць Польшчу, мясцовыя бізнесоўцы бачаць патэнцыял, сказаў падчас Усходняга эканамічнага кангрэсу ў Беластоку старшыня праўлення Польскага агенства Інвестыцый і Гандлю Томаш Пісуля. Паводле эксперта польскія біўнесоўцы назіраюць за Беларусю ды чакаюць, калі ўлады дазволяць больш шчыльна ўваходзіць на рынак:
– Мы бачым у Беларусі вялізны патэнцыял і вельмі б хацелі інвеставаць у Беларусь. Мы бачым, што ў стане дастаўляць тавары і аказваць паслугі, якіх у Беларусі няма. Мы можам іх прадаваць або ствараць у Беларусі, толькі трэба мець такую магчымасць. У палякаў ёсць капітал, які маглі б укласці ў Беларусь, пытанне ў тым, калі гэта дазволяць беларускія ўлады.
IV Усходні эканамічны кангрэс у Беластоку прыйшоў, як заяўляюць арганізатары, з рэкорднай колькасцю ўдзельнікаў. Беларусь прадстаўлялі дэлегацыі з Гарадзенскай і Берасцейскай вобласці і Менску. Прысутнічалі прадстаўнікі амаль усіх абласных аддзяленняў гандлёва-прамысловай палаты.
* * *
“Галоўнае, дзеля чаго я прыехаў, гэта паказаць польскаму боку магчымасці для інвестыцый у Беларусі”, – так кажа ўдзельнік Усходняга эканамічнага кангрэса ў Беластоку, старшыня Агенцтва польскага бізнесу ў Беларусі Анатолій Вялікін.
Ён прыгадвае, што летась таваразварот паміж Беларуссю і Польшчай склаў два мільярды даляраў, цяпер жа пастаўлена планка давесці яго да трох мільярдаў. На думку спецыяліста, для гэтага ёсць усе магчымасці:
– Самае галоўнае – я хацеў бы, каб польскі бок больш даведаўся пра тое, як развіваецца наша краіна, каб не баяліся інвеставаць у яе. Сёння ў Беларусі працуе больш за 350 кампаній з польскімі інвестыцыямі. І я думаю, што гэта толькі пачатак усяго гэтага руху.
Тое, што ў Беларусі палепшыліся ўмовы для замежных інвестараў, пацвердзіў нашаму радыё і старшыня польска-беларускай гандлёва-прамысловай палаты Казімеж Здуноўскі. Ён таксама лічыць важным тое, што змяняецца імідж Беларусі на міжнародай арэне:
– Становіцца паступова больш праўдзівым вобраз Беларусі. Яна была намалявана ў панурых колерах. А тым часам, калі глыбей паглядзець, адкінуць тую рыторыку, якая ў свой час функцыянавала, то штораз больш людзей бачыць, што гэта прыязны край, упарадкаваны, які глядзіць далёка ў будучае; край, які мае свае праблемы, бо гэта відавочнае; і край, які разлічвае на сур’ёзнае стаўленне да сябе.
У цяперашні час больш за 60 краін інвестуе ў Беларусь. На працягу многіх гадоў асноўнымі інвестарамі з’яўляюцца Расея і краіны Еўразвяза. Так, сёлета ў першым паўгоддзі з Расеі ў Беларусь паступіла 38 працэнтаў інвестыцый, а 54 працэнты – з краін Еўрапейскага звяза.
* * *
Некалькі соцень удзельнікаў з Польшчы, Беларусі, Літвы, Балгарыі ды некаторых іншых краін сабраў Усходні эканамічны кангрэс у Беластоку.
Гэта ўжо традыцыйнае мерапрыемства, падчас якога абмяркоўваецца шырокі спектр тэм: ад развіцця рэгіёнаў усходняй Польшчы да трансгранічнага супрацоўніцтва, турызму і эканамічнага дыялогу паміж краінамі.
Як адзначае віцэ-маршалак Падляшскага ваяводства Мацей Жыўна, вялікая колькасць удзельнікаў сведчыць пра паспяховасць такіх мерапрыемстваў:
— Сам удзел такой вялікай колькасці гасцей і сведчыць пра тое, што кангрэс патрэбны. Перш за ўсё для прадпрымальнікаў мы і праводзім гэтыя сустрэчы, якія даюць магчымасць наладзіць новыя сувязі, сустрэцца з прадстаўнікамі самаўрадаў, прадстаўнікамі улады, а таксама і з замежнымі дэлегацыямі. Найлепш пытанне пра эфектыўнасць гэтага Кангрэса задаць самім прадпрымальнікам, якія з году ў год кажуць, што ім патрэбная гэтая падзея. Паводле іх, гэта найлепшая падзея Падляшскага ваяводства ў галіне прамоцыі гаспадаркі.
«Беларусь злучае еўразійскую і эўрапейскую эканамічныя прасторы», – кажа кіраўнік свабоднай эканамічнай зоны «Гродна-Інвест» Сяргей Ткачэнка. Ён не першы раз прыязджае на Усходні эканамічны кангрэс, што праходзіць у Беластоку.
Паводле адмыслоўцы, менавіта беларускі бізнес становіцца правадніком еўрапейскага бізнесу на еўразійскую тэрыторыю. І першае, што тут важна – інфармацыя.
— Мы прапанавалі, і пакуль у нас атрымліваецца, аб’яднаць інфармацыйны патэнцыял Падляшша і Гарадзеншчыны з мэтай выпрацоўкі сумесных прадуктаў для інвестыцыйнай дзейнасці ў прамысловасці, у сферы турызму. У гэтым плане на мінулым тыдні ў нас прайшла вялікая выстава «Еўрарэгіён Нёман», дзе таксама вельмі шырока быў прадстаўлены польскі бізнес. А сёння мы тут.
***
«Гэта было добрае рашэнне як для беларусаў, так і для грамадзян Еўразвязу». Так каментуе ўвядзенне Беларуссю бязвізавага руху Міхал Падбельскі з Маршалкоўскай управы Падляшскага ваяводства. Ён таксама прыгадвае, што намаганнямі ваяводскага самаўраду і гарадзенскіх уладаў атрымалася адкрыць абноўлены пункт пропуску Рудаўка-Лясная на Аўгустоўскім канале.
Аднак, адзначае Падбельскі, актыўная супраца ідзе не толькі ў галіне турызму:
— Гэтая супраца вядзецца не толькі ў галіне турызму: пастаянна ідзе культурны і адукацыйны абмен, а таксама па лагістычна-транспартных пытаннях. Ідуць мадэрнізацыйныя працы на мяжы, каб падрыхтавацца да ўзмоцненага таварнага руху з Кітая.
Тэма трансгранічнага супрацоўніцтва будзе абмяркоўваецца падчас Усходняга эканамічнага кангрэсу ў Беластоку. У дыскусійнай панэлі возьме ўдзел кіраўнік Гародні – Мечыслаў Гой. Таксама ў другі дзень кангрэсу, 28 верасня, пройдзе дыскусія на тэму “Эканамічныя спатканні Польшча-Беларусь”. Адным з пытанняў пазначаны досвед Усходняга партнёрства.
Сёлета ў працы кангрэса бяруць удзел адразу некалькі дэлегацый з Беларусі. Гэта прадстаўнікі Свабоднай эканамічнай зоны «Гроднаінвест», а таксама дэлегацыі з Гародні, Берасця і Ваўкавыска на ўзроўні кіраўнікоў абласных і раённага выканаўчых камітэтаў.
Усходні эканамічны кангрэс працуе на працягу двух дзён (27-28 верасня) у будынку Падляшскай оперы і філармоніі ў Беластоку.
Арганізатарам Усходняга эканамічнага кангрэса з’яўляецца PTWP Group SA, ініцыятар і арганізатар Еўрапейскага эканамічнага кангрэса ў Катавіцах, найбуйнейшай бізнес-канферэнцыі ў Цэнтральнай Еўропе, якая праводзіцца з 2009 года.
Беларускае Радыё Рацыя
