Латвійскія і польскія памежнікі затрымалі новыя групы мігрантаў
Польскія і латвійскія памежнікі затрымалі новыя групы мігрантаў, яны нелегальна перабраліся з Беларусі ў „пошуках лепшага жыцця”.
Як паведамляе Delfi, за апошнія дні латвійскія памежнікі затрымалі тры групы — агулам 28 чалавек. Яны назваліся грамадзянамі Ірака. 12 з іх пераплылі раку на надзіманай лодцы. Мясцовыя жыхары дапамагаюць памежнікам — паведамляюць пра мігрантаў, якіх бачаць на аўтобусных прыпынках, дарогах і г. д. Затрыманыя іракцы знаходзяцца ў цэнтрах утрымання замежнікаў.
Польскія памежнікі 5 жніўня затрымалі на мяжы з Беларуссю 71 мігранта. Дакументаў у іх пры сабе не было. Мяркуецца, што ўсе яны прыехалі з Афганістана.
Тым часам літоўскія памежнікі працягваюць адпраўляць мігрантаў назад у Беларусь, адкуль яны прыходзяць. За мінулыя суткі было затрымана толькі 2 чалавекі. Раней іх былі сотні.
Беларускае Радыё Рацыя
Фота: Igaunijas policija
