Маржы з клубу “Марозныя стварэнні”
За вакном снег, мароз і вецер, а яны купаюцца ў ледзяной вадзе. Каля 30 чалавек штотыдзень збіраюцца ў Хорашчы. Мясцовы клуб маржоў “Марозныя стварэнні” ўзнік у гэтым сезоне. Як пераконваюць удзельнікі, непрацяглае знаходжанне ў вадзе бароніць ад хваробаў і паляпшае настрой.
Старшыня клуба Анна Васькоўская:
– Мы тут ужо ўсе сябры. Сустракаемся абавязкова раз у тыдзень, але бывае дамаўляемся і па тры разы прыязджаем.
Юрэк:
– Паспрабаваў прабыць у вадзе шэсць мінут. І было вельмі файна. З гэтага ўсё і пачалося, пачаў кожны тыдзень хадзіць на маржаванне. І штораз павялічваў час.
Удзельнікі клубу:
– Загартоўваемся. З кожным разам хочацца яшчэ больш.
– Тут файныя людзі. Цікавая атмасфера. Крыху паправіць здароўе хочацца, а не правесці нядзелю толькі ля стала.
Аматыры купання ў ледзяной вадзе сустракаюцца штотыдзень у Каміновым возеры ля Хорашчы. 8 лютага сябры клуба “Марозныя стварэнні” едуць на міжнародны злёт маржоў у Мельне.
Лукаш Леанюк, Беларускае Радыё Рацыя, Хорашч
Фота аўтара
Глядзіце таксама
