На Галічыне перапахавалі парэшткі польскіх жаўнераў
У галіцыйскім горадзе Мастыска, што непадалёк ад Львова, адбылося ўрачыстае перапахаванне 85 жаўнераў і афіцэраў Войска Польскага, якія загінулі тут напачатку Другой сусветнай вайны. Пра гэта паведаміла прэс-служба Мастыскай дзяржадміністрацыі.
Сярод перапахаваных магчыма не толькі палякі, але і ўкраінцы, беларусы і яўрэі.
Больш падрабязна – наш украінскі карэспандэнт Марцін Война.
Парэшткі 85 жаўнераў Войска Польскага былі знойдзены падчас пошуковых работ на Галічыне. Вайсковыя ідэнтыфікатары былі толькі на 22 целах. Гэтыя салдаты загінулі ў верасні 1939 года падчас баёў з нацыстамі і былі пахаваныя мясцовымі жыхарамі. З цягам часу месцы пахавання забыліся.
Жалобная цырымонія адбылася на старых могілках Мастыска. На цырымоніі прысутнічалі ўкраінскія і польскія святары розных канфесій, высокапасадоўцы з абедзьвюх краін, а таксама жаўнеры Войска Польскага, якія зрабілі над магіламі развітальны залп.
Пошукам і ўшанаваннем ахвяр вайсковых дзеянняў на захадзе Украіны займаецца грамадскае таварыства “Памяць”. Прытым актывісты гэтага таварыства з аднолькавай павагай ставяцца да ўсіх ахвяр вайны – незалежна ад таго, на якім баку яны ваявалі.
Тым часам пашукавікі таварыства “Памяць” выяўляюць усё новыя пахаванні жаўнераў Войска Польскага. Магчыма, па хуткім часе мы даведаемся таксама імёны загінулых на Галічыне беларусаў.
Марцін Война, Беларускае Радыё Рацыя
Фота PAP
