Набор у Беларускую Акадэмію працягнулі да пачатку зімы
У Беларускай Акадэміі, студэнты якой дыстанцыйна вучацца ў Польшчы, пачаліся заняткі. Але кіраўніцтва Акадэміі вырашыла працягнуць набор да пачатку зімы.
Кажа прафесар, доктар хабілітаваных навук, каардынатар ініцыятывы Святлана Куль-Сяльверстава:
– Мы не закрывалі набор на астатнія спецыяльнасці, мы маглі б закрыць. Але вельмі многа было просьбаў ад беларусаў: дайце яшчэ час да зімы, працягніце набор, мы хочам у вас вучыцца. Зараз яны не могуць па розных прычынах – хтосьці пераязджае, мігруе з Беларусі, хтосьці пад следствам, у кагосьці закрываюць бізнес і невядома ці будуць грошы. Розныя сітуацыі.
Адметнасцю навучання ў Беларускай Акадэміі з’яўляюцца анлайн-заняткі, якія адбываюцца як правіла ўвечары. Студэнты маюць права на польскія візы і легальнае пражыванне ў Польшчы. А таксама маюць права на працу ў Польшчы. Навучанне ў Беларускай Акадэміі платнае.
Васіль Кроква, Беларускае Радыё Рацыя
