Пачатак рамонту беластоцкага аўтавакзала адкладваецца
У будынку аўтавакзала па-ранейшаму працуюць білетныя касы і чакаюць ад’езду пасажыры, хоць закрыццё аб’екту планавалася ў пачатку кастрычніка.
Рамонт беластоцкага аўтобуснага вакзала затрымліваецца. Гэта звязанае з тым, што часовы вакзал, які мае служыць пасажырам падчас рамонту, яшчэ не падрыхтаваны. У сваю чаргу гэтая затрымка – на карысць дробным гандлярам, якія працуюць унутры будынка беластоцкага вакзала:
– Я сёння працую апошні дзень, але некаторыя яшчэ могуць застацца, пакуль працуюць касы аўтавакзала.
Пасажыры:
– Хочуць пабудаваць новы вакзал, магчыма меншы. Не можа быць, каб у Беластоку не было вакзала!
– Нязручнасці для пасажыраў будуць. Як будзе холадна, дзе людзі змогуць пачакаць, папіць кавы?
Маршалак Падляшскага ваяводства Юры Ляшчынскі:
– Работа будзе завершана да канца чэрвеня будучага года. На месцы старога аўтавакзала з’явіцца сучасны аб’ект.
У межах рамонту цалкам разбураць будынак вакзала. На яго месцы паўстане новы двухпавярховы аб’ект з білетнымі касамі, залай чакання і бюро аўтобусных кампаній. Аўтастаянкі з усходняга боку будынка будуць перанесеныя на заходні – бліжэй да гандлёвага цэнтра “Парк”.
[Not a valid template]
Лукаш Леанюк, Беларускае Радыё Рацыя, Беласток
Фота аўтара
